YMA leh NHIDCL te inkawm

Central YMA hruaitute leh Mizoram a inkalpawhna kawngpui siam hna thawktu NHIDCL hotute chu nimin tlai khan Aizawl Tuikhuahtlang a Central YMA Office-ah an inkawm.

He inkawmna ah hian Central YMA hruaitute hi President Lalhmachhuana chuan hoin Mizoram hmun hrang hranga NHIDCL in kawngpui an laih meka harsatna awm leh chinfel ngai nia lang Sub- Hqrs. YMA leh Group YMA atanga report an dawn te an sawipui a, Vairengte leh Sairang inkar Four Lane kawng laih tur chungchanga harsatna awm te lo en zui a, Sawrkar hotute an lo sawipui tur thu an hrilh bawk. Mizoram in kawngpui tha a neih theihna tura theihtawp chhuah zel tur leh harsatna an neih te pawh Central YMA-ah thlen zel turin an ngen nghal bawk a ni.

NHIDCL hotu Virendra Jakhar, Executive Director, NHIDCL pawhin Central YMA chu harsatna an tawh apianga an tlanluhna thin a nih thu leh an hnathawh te pawh a tul anga enho zel an duh thu a sawia, kawng laih meka harsatna awm te leh Compensation chungchanga harsatna awm te chu an lo enfiah tur thu a sawi bawk.