Union MoS in Siaha-a hmun hrang hrang a tlawh

Mizoram-a cham mek Union Minister of State for Health & Family Welfare SP. Singh Baghel chuan nimin khan Siaha-a hmun hrang hrang tlawhin an dinhmun a enfiah.

Union Minister SP. Singh Baghel hian nimin khan Govt. Siaha College tlawhin College Seminar Hall-ah zirlaite hma ah thu a sawi a. Taihmakna leh inpekna tel lo chuan hlawhtlinna chan theih a ni lo tih sawiin, zirlaite chu an zirna kawngah rilru leh ngaihtuahna zawng zawng seng thin turin a chah a. India ramin zalenna a hmuh atang khan 'Common Education' mumal taka kalpui a nih loh avaning harsatna tam tak zirlaiten an tawk tih sawiin, zirna kawngah mi hausa leh retheite kar a hlat phah tih a sawi a, Zirna lama mi lian leh te ber kara intluktlanna thlen turin 'Common Education System' chak tak kalpui a tul hle a, kalpui mek zel a ni, a ti.

Sawrkar School ten Private School an pha ta lo lutuk chu veiawm a tih thu pawh Union Minister chuan sawiin, Sawrkar School-a Zirtirtu ten nasa zawka tan an lak a tul thu a sawi a. Zirlaite chu ram leh hnam inghahna ber an nih avaning thiamna sang zawk pek an tul a, chutiang pe thei tur chuan zirtitute tang zual turin a chah a ni.

Union Minister of State for Health & Family Welfare hian District Hospital Siaha tlawh nghalin District Hospital hmunhma bakah Room hrang hrang a fangkual a. Hospital fai leh thianghlim taka an lo vawng thin chu lawmawm a tih thu sawiin, faina lam lo ngaipawimawh zel turin a chah a. Room hrang hrang a fankual pah hian Hospital thuneituten harsatna hrang hrang an hmachhawn mek an sawite chu a ngaihthlak sak a. An harsatna tawh ang angte chu a hma lam a chingfel turin hma a lak tur thu sawiin, tun dinhmunah District Hospital chuan Dialysis khawl an mamawh angin Dialysis khawl pakhat a pek nghal tur thu a sawi a ni.

Union Minister of State hian India hmarchhaka chengte tan Medical College tam zawk din a tul takzet tih pawh sawiin, North East-a Medical College tam zawk din a nih theihna turin ngaihnathiamna (relaxation) sang zawk pe tura hmalak a tum thu a sawi a. A bik takin District Hospital, Siaha chu Medical College a hlankai a nih theihna turin 'recommendation' a pek dawn thu a sawi bawk.

Arogya Mandir (Health & Wellness Centre), Siahatla pawh Union Minister hian tlawhin thawktute inpekna leh thawhrimna fakawm a tih thu a sawi a. Mipuite tana rawngbawlna pawimawh tak thawktu an nihna chu hre reng turin a chah bawk. He hunah hian Accridited Social Health Activist (ASHA) te pawh kawmin Pradhan Mantri Jan Arogya Yojna (PM-JAY) hnuaia hamthatna awm ang angte chu ASHA-ten an tel thuai tur thu a sawi bawk. Union Minister hian Siaha-a Assam Rifles hmun a tlawh hnuah nimin khan Siaha hi a chhuahsan a ni.

Comments

Popular News (Last 30 Days)

A hun pangngai ah Pavalai Intawhkhawmna neih tum a ni

LPG man bithliah thar a ni