Raltlan te a theih angin tanpui zel an ni dawn - CM

Chief Minister Lalduhoma chuan unau rambuai vanga himna zawnga rawn raltlan te chu a theih ang angin an tanpui zel dawn thu a sawi.

Burma Advocacy Group (BAG) hruaituten niminpiah-a a Pisa-a an kawmnaah Chief Minister chuan tunkar tir maiah khan Delhi-ah Union Home Minister Amit Shah nen an inkawm thu leh heng raltlante chhawmdawlna kawngah a tul anga rawn puih a inhuam thu a lo hrilh niin a sawi a. Tlawmngai Pawl te, Kohhran leh mimal te pawhin nasa takin raltlante an tanpui thu sawiin, Raltlante chungchanga a hmalakna tharlam hrang hrang BAG hotute hi a lo hrilh bawk a ni. 

Burma Advocacy Group hruaitute hian Burma atanga raltlan te tha tak leh duat taka Mizo mipuiten an lo tuamhlawm avangin Chief Minister hi lawmthu an hrilh a. An hruaitu American Baptist Churches General Secretary Emeritus, Rev. Dr. Roy Medley chuan Baptist Church te leh Burma mipuite chuan kum 200 dawn inzawmna an lo nei tawh tih a sawi a. Tuna an harsatna leh manganna te chu an vei hle tih sawiin, an theih ang tawka tanpui an duh thu leh, Mizoram mipuiten an lo tuamhlawmna ah pawh an lawmthu a sawi a ni. Burma Advocacy Group te hi Mizoram-a an cham chhungin mi pawimawh thenkhatte hmuin an kal kual dawn a ni.