Union Minister hovin Mizoram-ah Rozgar Mela hmangin hna hmu thar te Appointment Letter hlan an ni

India sawrkarin thalaite tana hna Kutpui a huaihawt thin, Rozgar Mela chu nimin khan rampum-ah hman leh a ni a, Mizoram-ah pawh Union Minister of Law and Justice Arjun Ram Meghwal hovin he hun hi hmangin Department of Post-a Branch Post Master leh Asst. Branch Post Master hna hmu thar mi 18 te Appointment Letter hlan an ni.

Aizawl-a Assam Rifles Gajraj Hall-a Rozgar Mela/Job Fair-ah hian Union Minister of Law and Justice Arjun Ram Meghwal chuan Prime Minister duh dan angin hnalak reng reng langtlang, dik leh awlsam thei ang bera kalpui a nih thu sawiin, hna hmu thar Rozgar Mela puala Appointment Letter hlan takte leh an chhungte a lawmpui thu a sawi a. Ram thang chak tak India rama hna hmu tharte chu ram tana innghahna an nih thu sawiin, an laka beiseina sang tak neih a nih thu a sawi a. Merit atanga teha tithate'n dik taka hna an hmuh theih nana hmalak chu sawrkarin a ngaihpawimawh thu sawiin, hna hmu tharte chu training tha tak neia rinawm taka hna thawk turin a chah a ni.

India ram in chak taka hma a sawn zel thu leh kum 2047-ah chuan ram changkang, Developed Country ni thei tura tan a lak thu sawiin, “Tun dinhmunah khawvela ram economy lian 5-na kan ni mek a, economy lian ber pathumna pawh nih thuai kan tum a ni,” a ti a. India chu Sector hrang hrangah khawvela hmahruaitu a nih mek thu leh hei hian sum leh pai lakluh leh ramchhung sum leh pai dinhmun siam that kawngah awmzia thui tak a neih thu sawiin, “State zawng zawngte hmasawnna tel lovin India in hma a sawn thei dawn lo a ni,” a ti bawk.

Union Law and Justice Minister Arjun Ram Meghwal chuan ram chhunga Post Office-te'n hma a sawn chhoh zel thu leh tihchangtlun mek zel a nih thu tarlangin, India Post Payments Bank (IPPB) anga Post Office-te an thawh tawh avangin hna pangngai bakah Banking thlengin an khawih tawh a, hemi a nih avang hian hna hmu tharte chu training tha tak buatsaih sak turin Post Office hotute a chah a. Culture vawnhim kawngah tanlak a ngaih thu pawh sawiin, Mizoram ASI neih dante ASI aiawha kalte a zawtfiah a; ASI, Assam Rifles leh Post Office hotute chu mamawh leh tul an neihte a hnena thlen hreh lo turin a chah bawk a ni.

Rozgar Mela hi sawrkar laipui ruahmanna, hna neilote tana hna siam sakna kawnga hmalakna niin, hna zawngtu leh ruaitute'n awlsam zawka hma an lak ho theihna tura ruahman a ni a; hemi kaltlang hian hna hmu tharte hnenah Appointment Letter sem chhuah thin a ni bawk a. Nimin khan India ramchhung State hrang hranga hmun 47-ah Rozgar Mela huaihawt niin hemi kaltlang hian sawrkar laipui, State leh UT hnuaia Department hrang hranga hna hmu thar mi nuai khat chuang te hnenah Appointment Letter pek a ni.