Latest News

Chapchar Kut hlut dan ngaihtuah a tul

Image
Mizo ten Kut chi thum kan neih zinga tun thleng kan la hmanlar ber Chapchar Kut chu kumdang ang bawkin kan lo hmang zo leh ta a, kumin hian Serchhip bikah chuan thil thar leh danglam lutuk awm lovin mipui ten an beisei thin ang ngeiin ‘Phullem chung ah’ Chapchar Kut hi kan hmang a, kan Mual in min dawl zoin kumdang-a harsatna kan tawh thin tam tak kan tawk lo thung niin a lang a, mipuite pawhin kan Phullem kan roh in kan dimdawi hle a, hetiang bawk hian sawrkar in mipuite tana hmasawnna hna a thawh te hi neitu rilru pu in enkawl ila, a tichhetu ni lo a a venghimtu kan nih zui zel hi a tul hle a ni.

Sawrkar in buhfai man-a senso a hmuh let loh tihtlem tumin ruahmanna thar a siam mek

Food, Civil Supplies & Consumer Affairs (FCS&CA) Minister B. Lalchhanzova chuan Ration Card Var nei te hnena sawrkar in Buhfai Subsidy a pek chu ennawn tum a nih thu sawiin, thla khat-a sum sen chu cheng vbc. 3 vel tala tihhniam tum a nih thu a sawi.

Inrinni kalta-a Aizawl Press Club-a thuthar thehdarhtute a kawmna ah Supply Minister B. Lalchhanzova chuan Mizoram-a Ration Card kalpui dan chungchang sawiin, Mizoram-ah Ration Card nei chhungkua 2,86,362 awm mekin hetah hian mihring 1,167,024 an awm mek tih a sawi a. Heng te hi Card Eng nei chhungkua 25,811-ah mihring 64,187, Card Pawl nei chhungkua 1,48,711-ah mihring 6,33,183 leh Card Var nei chhungkua 1,11,840-ah mihring 4,69,024 an nih thu a sawi a. Sawrkar in buhfai leina senso tihtlem nan hma a la mek tih sawiin, “January 2024 a buhfai leina senso a kan hman zat chu Rs. 1,56,927,944/- niin subsidy kan pek zat chu Rs. 7,47,58,271/- a ni a. A phurhna senso ah cheng vbc. 6 vel kan seng bawk a, buhfai man-a kan hmuh let loh tur hi cheng vbc. 13.47 a ni,” a ti a. Card Var tana sawrkarin buhfaia subsidy a pek thin chu ennawn an tum thu sawiin, Thla khata sawrkarin buhfai man a senso a hmuhlet loh chu cheng vbc. 13.47 a nih thu leh hemi atanga Subsidy-a sawrkar sum sen chu thla khatah cheng vbc. 3 vel tala tihhniam an tum thu a sawi a ni.

Supply Minister B. Lalchhanzova chuan ruahmanna an siamah Card Var chu chi hnih-a then an tum thu sawiin, Card var nei zinga mi neinung tak ni si te sawrkarin subsidy-a a pek thin chu tihtawp an tum thu a sawi a. Sawrkar in buhfai kg. khat Rs. 34/- a a lei chu Rs. 34/- tho a pekchhuah an tum thu leh Card Var pakhat zawk nei te erawh kg-ah Rs. 34 a lei a nih chuan Rs. 27/- a khulhtir tura ruahmanna an siam thu a sawi a. Thutlukna erawh an la siam rih loh thu leh Card dang te pawh ennawn a, mipui ten an dinhmun a zira Card dik an kawl a, an dikna chanvo an hmuh ngei theih nan Ration Card chu ennawn ngei an tum tih Minister chuan a sawi a. Card Var nei zingah Card Eng emaw, Card Pawl emaw a awm awm ngawih ngawih an awm theih vangin chung mite tan chuan February 2024 thlengin DCSO-ah in report theih a ni tih a sawi a. Ration Card-ah Politics inrawlh remtih a ni dawn lo tih a sawi bawk.

FCS&CA Minister chuan Retailer thil ti diklo an awm chuan complain hreh lo tura mipuite ngenin, “Retailer te inhawn hun tur hriattirna kan chhuah pawh theihtawpin kan umzui zel a. Mi harsa, nitin inhlawh chawp ten ration an khul theih nan retailer te chu thla 1 chhung hun an hawng ngei tur a ni a, retailer titha duh lo an awm chuan complain hreh lo turin kan in ngen a, a tul angin kan umzui zel dawn a ni,” tiin thuthar thehdarhtute hnenah hian a sawi bawk a ni.

Comments

Popular News (Last 30 Days)