Sum pe lawk lova damlo te enkawlna tur Mizoram Universal Health Care System duan mek a ni

Health Minsiter Lalrinpuii chuan damlo ten pawisa pe lawk lova Damdawi In-a an inenkawl theihna tur chu kalpui a nih tur thu a sawi a. Hei hi ‘Mizoram Universal Health Care Scheme’ hnuaia mi tur a ni ang.

Nimin khan Health Minsiter Lalrinpuii hian a Pisa-ah thuthar thehdarhtute kawmin ABPM-JAY kan tih thin hnuaiah Health Insurance - Golden Card kan tih mai chu mi 5,19,150 in an nei mek tih sawiin, hei hian mipui a huam kim loh avangin mipui zawng zawng huap tur ‘Mizoram Universal Health Coverage Scheme’ chu sawrkar in a duang mek tih a sawi a. Damlo ten anmahni pawisa seng lo a damdawi In-a an in enkawl theihna tur, Cashless System a kalpui a ni ang tih sawiin, Mizoram Universal Health Care Scheme atan hian sum hmuhna tur, sum hman dan tur leh bill siam theih chi hrang hrangte uluk takin an buaipui mek tih a sawi bawk a ni.

Health Minister chuan Aizawl Civil Hospital chu mipuiin an bawh nasa tih sawiin, Damdawi In hi a tawt a, chumi tihziaawm nan chuan Kulikawn Hospital chu tihchangtlun a nih tur thu sawiin, Civil Hospital Annexe siam nan hian State Level Executive Committee chuan cheng vbc. 89.68 a pawmsak tawh tih a sawi a. Mizoram District hrang hrangah Health Department chuan hma a lak thu sawiin, District Hospital 10-ah te chuan Thisen leh Zun test-na Laboratory changtlung tak din tuma hmalak mek a ni tih a sawi a, a thawh khatna atan District pathum – Siaha, Hnahthial leh Champhai-ah te hmalak hmasak mek a ni, a ti.

Tunlai ah chuan Laboratory chu damlo dinhmun zirchianna hmasa ber anih avangin National Health Mission hnuaiah Mizoram-a CHC leh PHC 21-ah Block Public Health Unit anga Laboratory din tura hmalak a ni bawk tih Minister chuan sawiin, tunah hian Block 7 - Ngopa CHC, Vairengte CHC, Kawrthah CHC, Chawngte CHC, Thenzawl CHC, Cherhlun PHC leh Tuipang PHC chu hawn theih maia peih tawh an ni tih a sawi.

Health Minister chuan hna thawktu indaihlohna chungchang pawh sawiin, SEDP hnuaia Nurse leh Health Worker te chu rawih chhunzawmna tur sum a awm tawh loh avangin chawlhtir an ni tih a sawi a. Hemi avanga Health Sector awmpalh thei venna turin thawktu awmsa semrual tura hmalak niin, Department lama hotuten an zirchiang mek niin a sawi a. Thawktu indaihlohna zualpui phuhuruk nan hian Nurse 143 lak belh tumna chu sawrkar thuneitu lamah thlen mek a ni, a ti bawk.

Ruang thawn leh phurh chungchangah pawh Mizoram sawrkarin mumal zawkin hma a la dawn tih sawiin, “A kalphung tur Guidelines kan duang mek a, a senso tur sum pawh tun Budget Session-a pass theih turin dah kan tum a ni,” a ti bawk.