Serchhip District-ah kum 2022 aiin kum 2023-ah Malaria kai hmuhchhuah mi 19-in an tam zawk

Kum 2022 khan Serchhip District-ah Malaria kai mi 28 hmuhchhuah an nih laiin nikum 2023-ah mi 47 zet hmuhchhuah an ni a, nikum hmasa aiin nikum-ah Malaria kai hi mi 19 zetin an tam zawkin kum 2022 leh 2023-ah te hian Serchhip District-ah Malaria vanga thi mi pakhat ve ve an awm bawk a ni.

District Task Force on Malaria Elimination thutkhawm niminpiah-a Serchhip-a neih ah kum 2 kalta chhunga Serchhip District chhunga Malaria dinhmun tarlan a nih danin kum 2022 chhung khan Serchhip District-ah mi 28,919 enfiah atangin Malaria hrik pai mi 28 hmuhchhuah an ni a, thisen enfiah atanga za zela 0.096 ten Malaria hrik an kai a. Kum kalta 2023-ah mi 26,913 te enfiah atangin Malaria kai mi 47 hmuh an ni thung a, nikum hmasa aiin nikum-a Malaria kai hmuhchhuah hi 19 in an tam zawk a, thisen enfiah atanga za zela 0.174 te chuan Malaria hrik an pai a ni. Malaria hri kai hmuh te zingah hian Thenzawl CHC huamchhung a mi tam berin mi 16 hmuh an ni a, Serchhip Centre-ah mi 12 hmuin North Vanlaiphai CHC-ah 8, Khawlailung PHC-ah 5 leh East Lungdar PHC-ah 4 bakah Ngentiang PHC-ah mi 2 hmuh an ni.

Chhinchhiahna atanga a lan danin kum 2022 khan Serchhip District-ah Malaria PF leh PV vei mi 14 ve ve hmuhchhuah an ni a, nikum khan Malaria PF kai mi 19 hmuh niin Malaria PV kai mi 28 hmuh an ni bawk a ni. Nikum leh nikum hmasa ah te khan Serchhip District-ah hian Malaria vanga nunna chan mi pakhat ve ve an awm a, nikum hmasa a Malaria vanga thi hi Chhing-chhip PHC huamchhunga mi a nih laiin nikum-a thi hi Serchhip huamchhung a mi a ni thung.

Nikum chhung khan Serchhip District-ah hian Malaria chungchanga inzirtirna kawng hrang hranga kalpui niin aurinna hmangin tum 64 inzirtirna neih a ni a, Zirna In-ah tum 72 inzirtirna hun hman ni bawkin NGO hrang hrangte hnenah tum 41 hun hman a ni bawk. Hei bakah hian Loneitute leh kuthnathawktute chu an hnathawhna hmun ah tum 9 tlawh niin tualchhung chanchinbu ah tum 5 inzirtirna thu chhuah a ni bawk.