Governor in NCC Cadet mi 4 chawimawina a hlan

Mizoram Governor Dr. Hari Babu Kambhampati chuan kumin Republic Day lawmna pui ber New Delhi-a neih taka Republic Day Camp (RDC)-2024 a tel Mizo NCC Cadet pali, mipa 3 leh hmeichhe 1 te chu nimin khan lawmpuina a hlan.

Republic Day Camp 2024-a Mizoram atanga tel te hi 1st Mizo Air Sqn NCC atangin Cadet Under Officer KC. Lawmsangpuia, Cadet Corporal H. Malsawmtluanga, Cadet Corporal Celine Vanlalhriati leh 1st Mizo Battalion RDC atangin Cadet Corporal C. Lalruatmawia te an ni a. Heng NCC Cadet 4 te hi ngaihhlut hlawh tak Line Area, Flag Area leh Prime Ministers Rally-ah te an tel thei a; North Eastern Region (NER) Directorate Group Dance & Ballet, National Integration Awareness Programme (NIAP) leh Youth Exchange Programme (Cultural) ah te an tel bawk a ni.

Governor Dr. Hari Babu Kambhampati chuan NCC Cadet chhuanawm tak te hi lawmpuina atan Laptop leh Chawimawina thuziak a pe theuh a. Felicitation program-ah hian Governor chuan NCC Cadet te chu kawm chhunzawmin Mizo thalaite tana Indian Armed Forces hnuaia hnathawh tur tha tak tak chungchang te a sawipui a ni. He hunah hian Colonel SS Kalia, Commanding Officer, 1st Mizo Battalion NCC, Wing Commander Lalrinsanga, Commanding Officer,1st Mizo Air Squadron leh HZK Vanlalsawma ten NCC Cadet te hi an kaihruai a ni.