State Level Veer Gatha-a titha te hnena lawmman hlanna hun nimin khan buatsaih a ni

Ram chhunga mi huaisen chawimawina dawng tawhte ngaihhlut an nih theih nan leh zirlai sikul naupangte pawhin huaisen taka ram leh hnam hmangaihna thinlung an put theih nana School Education Department-in intihsiakna hrang hrang a buatsaih State Level Veer Gatha-a titha te hnenah nimin khan lawmman semna neih a ni.

School Education Department Conference Hall, Aizawl-a he hun hman hi School Education Department changtu Secretary Dr. Lalzirmawia Chhangte chuan hmanpuiin sawrkar leh Department hmalakna hrang hrang leh Veer Gatha Project atangin National Language thiam pawimawhna a lang hle-a a hriat thu a sawi a; Veer Gatha Project chungchangah Sipai leh Civil mi huaisen lawmman dawng an thahnem tawh hle tih sawiin, an nunah entawn tlak a tam a, mipui leh vantlangin an chhawr thin a ni, a ti a. “Mi huaisente chuan an nunna thapin hma an hruai thin a, midangte pawhin thil tha ti turin thil harsa leh khirhkhan pawh an hmachhawn ngam phah a ni,” a ti bawk. Education Secretary chuan Zirlaite chu an tum tisang tura fuihin, India ram politician lar ni thei tur hialten huaisen takin ngaihtuahna hmang se a duh thu a sawi a; zirlaite chu an zirnaah leh Sport an neihna bakah an thil tihna kawng hrang hrangah a sang ber ni thei tura theihtawp chhuah thin turin a chah a. Mizo mipui leh hnam pumpui pawh fing taka ngaihtuahna hmang chungin hnam huaisen kan nih a ngaih thu te, kan huaisen theih nan ei leh bara intodelh theih te a pawimawh thu te a sawi bawk.

Nimin-a he hun hman kaihruaitu School Education Department Director Lalsangliana chuan Veer Gatha chu ramchhunga mi huaisen chawimawina dawng tawhte ngaihhlut an nih theih nan leh zirlai sikul naupangte pawhin huaisen taka ram leh hnam hmangaihna thinlung an put theih nan intihsiakna hrang hrang – Story Writing, Paragraph Writing, Poem, Painting, Multi-Media Presentation hmanga School-a inelna a nih thu a sawi bawk.

He intihsiakna hi District level Evaluation Committee-in DEO (District Nodal Officer) te kaihhruaiin an lo endik a, an thlanchhuah chu State Level Evaluation Committee-in Director of School Education kaihhruaiin an endik ve leh a, State Level Veer Gatha lawmman dawngtu mi pariat thlanchhuah niin Mizoram in nomination a neih theih zat National Level-ah mi 40 rawta thawn thlak a ni a; vanduaithlak takin National Level Veer Gatha lawmman dawng an awm lo a ni.