AIR-a thawk thin mi 3 Court in thiamloh a chantir

All India Radio (AIR), Aizawl-a thawk dan diklo taka che-a sum ti chingpen a puh mi pathum te chu nimin khan Special Judge (Prevention of Corruption Act) Dr. HTC. Lalrinchhana chuan thiamloh a chantir.

January 2012 atanga June 2012 inkar chhungah khan khatih hunlaia All India Radio (AIR), Aizawl Station-a Asst. Director Zosangzuala, Programme Executive Lalnunziri leh LDC Judy H. Lalmuanpuii te chuan All India Radio, Aizawl Station-a thawk tur angin a tak awm si lovin Casual Production Assistants 20 zet chhawr anga ziak felin, heng ho hi tum 54 zet chhawr angin ziah a ni a, hemi atana sawrkar pawisa kal ral chu Rs. 2,60,444 nia chhut a ni a. Hei bakah hian an ni pathum ruahmanna in a tak awm si lovin Music Artiste 39 zet te hla record anga tarlan a ni bawk a, heta tana mipui sum kalral hi 6,08,916/- zet ni a chhut a ni a. AIR- Directorate, Akashwani Bhawan, New Delhi in Budget estimate 2011-2012 atan All India Radio, Aizawl hnenah North East Special Package (NESP) hnuaia cheng nuai 8 leh PPSS (Payment for Programme and Special Services of IEBR (Internal and Extra Budgetary Resources) hnuai atanga cheng nuai 86.73 an pek khawih chingpenna ah heng mite hi puh an ni bawk.

He thubuai ngaihtuahnaah hian CBI lam thuhretu mi 49 zet Court-ah thu zawhfiah niin, lehkha leh tul dang Court-a pholan (exhibit) pawh CBI lam hian 1154 zet an nei a. CBI lam hian an thubuai hi Court-ah finfiah zo in Judy H. Lalmuanpuii hi Programme Secretary a nih angin, Head of Programming Zosangzuala leh Programme Executive Lalnunziri te nen in thurual in hetianga a tak awm lo Casual Production Assistant mi 20 leh Music Artiste mi 39 te hi chhawr anga tarlangin, hetiang hlawh tur cheque hmanga buaipuiin, cheque-ah pawh hian Judy H. Lalmuanpuii hian hming sign sak ve thin a, Lalnunziri hian Music Artiste te tan hian Performance Certificate te pawh lo siam sak lehzel a. Zosangzuala phalna leh remtihna ang veka buaipui an ni thung a ni.

Cheque lem paruk chu Zosangzuala hian SBI, Aizawl Branch-ah a hnuaia thawk Lalramtiama, LDC hruaiin dik lo taka pawisa an lakchhuah pawh amah ngei hian a pawm nghe nghe a. Heng te avang hian Section 120B r/w 409/419/420/467/468/471 IPC leh section 13 (2) r/w 13 (1) (c) & (d) of Prevention of Corruption Act, 1988 angin

Zosangzuala, Chanmari, Aizawl; Lalnunziri, Tuikhuahtlang, Aizawl leh Judy H. Lalmuanpuii, Khatla South, Aizawl te hi Court chuan thiamloh a chantir ta a ni. Heng mite hi thiamloh chantir (Convict) an nih angin bail leh bond lo awm te sut (cancel) sak an ni a, Lung In-ah khung nghal tura tih niin karleh Thawhtanni khian hremna tur puan a ni ang.

Comments

Popular News (Last 30 Days)

LPG man bithliah thar