Siaha-ah Myanmar raltlan chungchang sawiho a ni

Nimin khan Siaha-ah District Level Committee on Myanmar Refugees chu thukhawmin Myanmar atanga an District chhunga raltlan rawn lut te chungchanga thu pawimawh hrang hrang an sawiho.

He thutkhawm DC Mini Conference Room-a neih hi District Bawrhsap Lalhmun-sanga Hnamte chuan kaihruaiin thu pawimawh chhawpchhuah pali ngaihtuah a ni a, Myanmar lam atangin ruihhlo, a bik takin damdawi No. 4 a lut nasa tih pawmin, heng damdawi te hian thalai nunna a suat nasat avangin ramri ah uluk lehzual a fimkhur tul an tih thu an sawi a. Ramri-a a Duty mek Assam Rifles ten hmalakna chak zawk an neih theih nan MTP leh khawtin a VC te bakah Police ten thawhhona tha zawk nei se an ti.

Hei bakah hian Birth Certificate pek chhuah kawngah fimkhur a tul thu pawh sawiin, Refugees zinga nau neite chu Sawrkarin Birth Certificate pechhuak lo tura a tih angin a tul anga hmalak chhunzawm zel ni se an ti a. Birth Certificate pek dawnah India khua leh tui dik tak a ni em tih chu uluk zawka lo enfiah thin nise an ti a. Raltlan ten an hman uar ber pakhat Kenbo (two wheeler) chu khauh zawka khuahkhirh a tul thu pawh sawiin, Registration felfai tak siam leh lo enzui chu pawimawh an tih thu an sawi a. A bik takin Kenbo te chu Siaha khawpui bikah chuan tlan phalloh nise, khaw kar kawngah pawh permit nei te chauh tlan tir nise an ti a ni.

Raltlan zingah ei leh bar tlachham an awm lohna tura theihtawp chhuaha hmalak rel bawkin, tun dinhmunah Lopu leh Lomasu Raltlan Camp ten ei leh barah harsatna an tawh tan avangin Sawrkar hotute hnenah thlen nise an ti a. Raltlan lo luhbelh thei reng dinhmunah a din avangin lo inralrin lawk nise an ti a. Raltlan Camp-a Medical lam ten Clinic an neih thin chu a tul ang zelin lo chhunzawm se an ti bawk.