Central YMA hruaitu ten ramdang a hnathawk tur thawn thin Employment Agency te an kawm

Central YMA chuan ramchhung leh rampawn-a thalai hnathawk tur thawnchhuak thin, Employment Agency te chu nimin khan Aizawl-a an Office-ah kokhawmin ramdanga hnathawka chhuakte harsatna tawh chungchang leh thawhho dan turte an sawipui.

Central YMA President Lalhmachhuana kaihhruai he inkawmhonaah hian Agency hrang hrangten Mizo thalai hnathawk tura ramdanga an thawnchhuah dan kalhmang leh harsatna an tawh te an sawi a, ramdanga hnathawka awm ten harsatna an tawh dante pawh sawilan a ni bawk a. Agency te hian Mizoram Sawrkar ah Deputy Commissioner (DC) kaltlangin License an neih thu leh The Mizoram Private Placement Agencies (Regulation ) Act, 2015 hmanga hnathawh thin a nih thu an sawi a ni. 

Central YMA hruaitute chuan Mizo thalai engemaw zatin ramdang ah hna an thawh theihna tura an kal theihna tura Agency te hnathawh leh Mizo thalaiten eizawnna an nei thei chu lawmawm an tih thu an sawi a. Chutih rualin rampawn a hnathawk thalai harsatna tawk ten an hnenah harsatna an thlen thin avanga inkawmna hi buatsaih a nih thu an sawi a. Agency te chu Document dik tak hmanga hnathawk tur thawn thin tur leh kum tlinglo te thawn lo turin an ngen a, an thawnchhuah te pawh enzui zel tur leh an harsatna te chinfel kawngah mawhphurhna la zel thei turin an chah bawk a ni.

He hunah hian Central YMA President Lalhmachhuana chuan thalai hlawhtling ngei tur leh rintlak te chauh ram pawna hnathawk tura thawn thin tur leh fimkhur taka hma la thin turin Agency te a chah a, thalai hna zawng lai ramdanga hnathawk turte pawh mahni nihna dik tak leh document dik chauh hmang turin a chah nghal bawk a. A theih angin Central YMA in mumal zawka Agency ten hna an thawh theih dan turah ngaihtuahna an sen tur thu a sawi bawk.