Bairabi-Sairang Rel kawng zofel thei dawn hnai

Bairabi atanga Sairang inkar Rel kawng siam hna chu harsatna neuh neuh a awm avangin a hun takah zawh theih a ni dawn ta lo a. Ruahman dan chuan kumin March thla hian Kawnpui thleng kaltir a, October, 2024-ah chuan Sairang thleng kaltir theih tawh beisei a ni.

Kilometer 51.38-a thui Bairabi to Sairang Rel kawng siam nan hian a tirah cheng vbc. 2,393.49 ruahman niin a hnua ah revised niin cheng vbc. 5,021.45 a ni a, a zawhna atan hian cheng vbc.  6527 vel ngai tura chhut a ni.

He Rel kawng siam meka Sairang bula Lei chim avangin hnathawh thenkhat khaihlak deuh mah se hmun dangah chuan harsatna awm lovin hnathawh chhunzawm zel a ni a, hei vang hian Kawnpui thleng Rel kawng siam hna chu March, 2024 hian zawh tum a ni a. Tun dinhmunah Rel kawng siam hna hi a pum puiah 90% aia tam thawh zawh tawh a ni a, Major Bridge siam hna thawh mek tih lohah chuan hnathawh hi zawhfel thuai beisei a ni.

Bairabi-Sairang Rel kawng hi Rel kawng lian, Broad Gauge Railway Line tur a ni dawn a. RITES-ten he Rel kawng sial survey hna hi kum 2005 bawr khan an zofel a. Rel kawng siam hna hi sawrkar laipuiin kum 2008-2009 khan sanction-in hna hi kum 2015-ah khan tan a ni a, Railways Engineer he hna viltute chuan November/December, 2023-ah zawhfel beisei a nih thu an lo sawi tawh a ni.

Bairabi atanga intanin Sairang huam telin Rel Station pali a awm dawn a. Chungte chu Bairabi atanga a hlat zawng tehin, KM 16.38-ah Hortoki Rel Station; KM 26.10-ah Kawnpui Rel Station; KM 37.12-ah Mualkhang Rel Station leh a tawpna KM 51.38-ah Sairang Rel Station (Sihhmui) te an ni a. Heng hmuna Rel Station Building thenkhatte chu sak zawh thawkhat an ni tawh a ni.

Bairabi to Sairang inkar Rel kawng thui zawng hi KM 51.38 niin Lei dawh lian (Major Bridge) 55 leh Lei dawh tenau (Minor Bridge) 87 a awm a. Hmun 32 laiah leiverh (tunnel) a awm a, leiverh zawng zawng thui/sei belhkhawm pawh hi KM 12.63 a ni dawn a. Leiverh tunnel thui ber sei/thui zawng chu KM 1.88 a thui a ni.

He Project atan Railways-in ram hectare 481.18 a zau an hmang mek a. Kolasib District huamchhungah Forest ram hectare 38.94 a zau leh Non-Forest land mimal ram hectare 308.01 a zau leh Aizawl District hua chhung ah Forest ram hectare 35.547 a zau leh Non-Forest land mimal ram hectare 98.595 zau an hmang a. Heng zawng zawngah hian zangnadawmna compensation cheng vbc.  840 bawr vel ram neitute pek an nih tawh nia thudawn a ni.