Serchhip-a Kohhran hrang hrang hruaitute Zuk leh hmuam that loh dan zirtir an ni

Serchhip khawpui chhunga Kohhran hrang hrang hruaitute tan Vaihlo leh a kaihhnawih hrang hrang that loh zia inzirtirna chu nimin khan Serchhip CMO Conference Hall-ah neih a ni.

National Tobacco Control Programme (NTCP) bultuma 'Workshop/Training on Tobacco Control for Church Leader' hi Serchhip-a Sr. Chief Medical Officer Dr. LP. Malsawma chuan kaihruaiin he hun hmanpuitu NTCP-a State Nodal Officer leh Health Department-a Addl. Director Dr. H. Lianthangpuia chuan NTCP chu National Health Mission (NHM) hnuaia Programme 30 dawn awm zinga pakhat a nih thu leh Mizoram pumah thawktu mi 41 awmin District tinah mi 4 zel awmin Vaihlo leh a kaihhnawih dona ah kawng hrang hranga hma an lak thin thu a sawi a. An hmalakna hnuaiah hian Kohhran hrang hrangah Vaihlo that loh zia inzirtirna te nei thin mah se Kohhran Hruaitute atanga hmalak chu a sawt zawk beiseiin he hmalakna kalpui leh a nih thu leh nikum lam khan Mizoram Kohhran Hruaitute Committee (MKHC) te tan Vaihlo thatloh zia inzirtirna hi buatsaih a lo nih tawh thu a sawi a. Tunah hian District tinah inzirtirna hi kalpui leh mek a nih thu a sawi bawk.


Vaihlo chu mihring te natna hrang hrang thlentu langsar ber a nih thu Dr. H. Lianthangpuia chuan sawiin, inkaichhawn theih loh natna, Non-Communicable Diseases (NCD) chu khawvela thihna thlentu natna langsar ber a nih thu leh heng natna thlentu ber chu zuk leh hmuam a nih thu a sawi a. Heti chung hian Mizoram chu India ramah zuk leh hmuam hmang nasa ber kan ni tih sawiin, hei vang hian Vaihlo la hmang ngai lo te venhim leh a lo hmang tawh thin te sim tir tum chu an hmalakna lian ber a nih thu a sawi bawk a. Ruihtheih thil tih avanga harsatna tawk tam ber te hian ruihtheih thil an tih hmain Vaihlo hmanga zuk leh hmuam an tih hmasak thin avangin Vaihlo chu ruihtheih thil chi hrang hrang tih bul tanna a nih thin thu a sawi bawk a ni.

Nimin-a he inzirtirna hunah hian NTCP-a State Consultant R. Lalremruata chuan Kohhran hrang hrang atanga hruaitu kalkhawmte chu Vaihlo thatlohna te a lem nen entirin zirtirna a pe a. Zirchinnaa tarlan a nih danin Phai a damlo refer te zingah za zela 92.23 in zuk leh hmuam an ti a, Cancer vanga refer za zela 34.32 awmin Cancer zinga za zela 85 te chu zuk leh hmuam vang a ni a, za zela 75 te chu zuk leh hmuam ti lo mahse an chhungte tih vanga vei an ni.

Comments

Popular News (Last 30 Days)

Vawiin-ah HSSLC Exam result