Kawlphetha renchem a tul zia inzirtirna a Serchhip District-a hma la tha te lawmman hlan an ni
Power & Electricity Department hnuaia Electrical Inspectorate, State Designated Agency for Energy Conservation hmalakna in Energy renchem inzirtirna tur hian Serchhip District chhung zirna In 20-ah Energy Club hi din niin nikum November 9 khan Energy Club Teacher Incharge te tan Training buatsaih a nih hnuah he hmalakna kharna leh lawmman semna hun hi nimin khan Serchhip Auditorium-ah neih a ni a, he hun hi Project Coordinator Vansangliana chuan kaihruaiin P&E Department-a Chief Electrical Inspector Er. R. Romawia chuan Energy renchem a nih theih nana Energy Conservation Act. 2001 kaltlangin sawrkar laipui atanga hmalak a nih thu a sawi a, zirlai naupang kalkhawmte chu energy renchemna tura tha thawh tura hun tha an neih angin kawlphetha renchem nachang hre tura chahin, an theihna zawn theuha midangte hrilhhretu ni turin a chah bawk.
He hunah hian P&E Serchhip Division-a SDO Er. Lalhruaitluanga pawhin mipui ten kawlphetha kan hman nasat avanga tunhnaia harsatna thleng te tarlangin, kawlphetha kan neih ang ang te renchem taka kan hman a tul thu a sawi a. He huna tel zirlai naupangte chu anmahni chhungkua ah theuh kawlphetha renchem tur leh midangte pawh zirtir chhawng zel turin a chah bawk.
Serchhip District-a Energy Club dinna te hi Serchhip-a zirna In panga bakah Chhiahtlang, Keitum leh Thenzawl-ah pahnih theuh leh East Lungdar, Mualcheng, Bungtlang, Baktawng, Lungchhuan, Khawlailung, Chhingchhip, North Vanlaiphai leh Hualtu-ah zirna In pakhat theuh te an ni a. Energy Club-a tel zirlaite hian kawlphetha renchem a nih theihna turin kawng hrang hrangah zirtirna pein intihsiakna te an nei a. Energy Club intihsiakna ah Chawngbuangi Memorial M/S, Serchhip chu pakhatna niin Rs. 10,000/- an dawng a, pahnihna Govt. M/S-I, East Lungdar in Rs. 8000/- leh pathumna Govt. M/S, North Mualcheng in Rs. 6000/- an dawng a, School 7 te hnenah Consolation Prize Rs. 4000/- theuh hlan an ni.
Club Member inelna ah B. Lallawmsangi, Govt. East Lungdar M/S-I chu pakhatna niin lawmman ah Rs. 1000/- a dawng a, pahnihna Malsawmtluangi Pachuau, Presbyterian English School, Baktawng chuan Rs. 800/- leh pathumna Lalruatsanga, Govt. North Mualcheng Middle School chuan Rs. 600/- dawngin zirlai 10 te hnenah Consolation prize Rs. 500/- theuh hlan an ni.
Club Member te tana ‘Electrical Energy renchem dan’ tih thupui hmanga Essay inziah-siakna ah Vanlalnunkima chu pakhatna niin Rs. 2500/- a dawng a, Vanlalruatsaka chu pahnihna niin Rs. 2000/- leh pathumna Betsabi Lalhunchhungi’n Rs. 1500/- a dawng a, Goodwill English Academy, Serchhip-a zirlaite vek niin Zirlai 10 hnenah Consolation Prize Rs. 1000/- theuh hlan an ni bawk.
Comments
Post a Comment