Serchhip District-a PMMSY hnuaia Sangha Dil thar siam turte an hmalak dan tur hrilhfiah an ni

Sawrkar laipui ruahmanna Pradhan Mantri Matsya Sampada Yojana (PMMSY) hnuaia kum 2022-2023 chhung atana Serchhip District atanga Sangha Dil laih tanpuina dawng turte chu nimin khan Serchhip-ah kohkhawm niin an hmalak dan tur hrilhfiah an ni.
PMMSY hnuaia Sangha Dil thar laih tanpuina dawng turte hi New Serchhip YMA Hall-ah kohkhawm niin he hun kaihruaitu Serchhip District Fisheries Development Officer (DFDO) Lucy Lalrinpuii chuan Sangha Dil hi chi thum (3)-ah then a ni tih sawiin, a note, a thanglai rual leh a puitling dahna te a nih thu a sawi a. Tuna tanpuina an sem tur chu a thanglai rual, kut zungchal chen vel atanga Nguntang tiat vel enkawlna tur a ni tih a sawi. Serchhip DFDO chuan PMMSY hi kum 2020 atangin Serchhip District-ah kalpui a ni tih sawiin, tum engemaw zat tanpuina hi sem nih tawh thu leh tanpuina dawng pawh mi engemaw zat a awm tawh laiin, kan Sangha tharchhuah erawh a pung chak lo tih a sawi a. Hei vang hian hlawhtling zawka he hmalakna hi kalpui a nih theih nan sum tam tak leh hun tam tak sengin hetianga training hi buatsaih a ni tih a sawi a. Tanpuina dawng turte chu Mizoram leh anmahni hmasawnna tur duhna rilru pu turin a chah bawk.

PMMSY 2022-2023 hnuaiah hian Serchhip District atangin New Rearing Pond siamna tur hian mi 50 te hnenah tanpuina hi pek an ni dawn a. Heng te hi Serchhip atangin mi 10, North Vanlaiphai leh Buangpui atangin mi 5 ve ve, Chhiahtlang leh Thenzawl atangin mi 4 ve ve, Neihloh, Hualtu, Khawbel, Ngentiang, Leng leh Chekawn atangin mi pahnih theuh leh Kanghmun South, Zote South, Chhingchhip, Sialhau, Chhuanthar Tlangnuam, North Mualcheng, East Lungdar, Bungtlang, Keitum leh Hriangtlang atangin mi pakhat theuh te an ni a. PMMSY hnuaiah hian Rs. 84,000/- sengin Sangha Dil hi laih tur a ni dawn a, hemi atanga za zela 54, Rs. 45,360/- chu Sawrkar laipui tum tur niin za zela 6, Rs. 5040/- chu State sawrkar tum tur a ni a, za zela 60, Rs. 33,600/- chu tanpuina dawngtute tum ve tur a ni dawn thung a ni. He sum hmang hian a te berah Sangha Dil hectare 0.12, a dung meter 50 leh a vang meter 20 vela zau a siam tur a ni dawn a, Mizoram ang tlangram ah chuan hetiang tiat hi siam a harsat avangin harsatna awm thei sukiang tura ruahmanna te siam a ni bawk.

Nimin-a training-ah hian Serchhip DFDO Office atangin Chanchinmawia, AFO chuan Sangha Dil siam dan leh tanpuina pek an nih dan turte sawiin, ruahman anga sum hmang lo te chu Dan hmanga tanpuina an dawn tawh rulh tir leh theih an nih thu te a sawi a, zawhna leh chhanna hun hman a ni bawk. Hemi hnu hian heng tanpuina dawng turte hi Bank Account kaltlanga sum pek an nih theih nan an Bank Account te enfiah sak nghal an ni bawk.