Serchhip District-ah E. Roll thar tlangzarh niin Draft Roll aiin Vote nei thei 101 in an tlem zawk

Kumin January ni 1-a kum 18 tling chin te laa Electoral Roll ennawn hna chu zawhfel niin nimin khan Final Electoral Roll chu Mizoram District hrang hrangah tlangzarh a ni a. Electoral Roll thar atanga a lan danin Serchhip District chhunga Assembly Bial pathum-ah Vote nei mipa 26,652 leh hmeichhia 27,922, an vaiin 54,574 an awm a ni.

Serchhip District-ah chuanElectoral Roll tlangzarhna hun hi nimin khan Serchhip DC Meeting Hall-ah Serchhip DRDO Project Director HD. Lalpekmawia hova neih niin Final Electoral Roll tlangzarh a ni ta chu lawmawm a tih thu a sawi a, Electoral Roll thar buaipuitu ERO, AERO, BLO, Election Branch a thawktu te zawng zawng leh khawtlang hruaitute, Political Party leh tlawmngai pawl, he Electoral Roll a puitlin theihna tura thawktu zawng zawng te hnenah lawmthu a sawi a. Electoral Roll hi Political Party hrang hrang aiawh kalkhawm te hnenah a hlan nghal a ni.


Nimin-a Electoral Roll tlangzarh tak atanga a lan danin Serchhip District chhungah Assembly Bial pathum (3) awmin Polling Station 88 a awm a, Serchhip District pumah Vote nei 54,574 awmin heng te hi mipa 26,652 leh hmeichhia 27,922 te an ni a, heng Vote nei thei zinga 413 te chu Service Voters niin mioa 410 leh hmeichhia pathum an ni. General Voters-ah Vote nei thei zawng zawng 54,161 niin mipa 26,242 leh hmeichhia 27,919 an ni a. Draft Electoral Roll nena khaikhinin Final Roll-a General Voters hi 101 in an tlahniam a. Kum tling thar Electoral Roll a inthun thar engemaw zat an awm rualin, Electoral Roll atanga hming paih leh hmundanga pem ta te avangin Final Roll-ah hian voters an tlahniam a ni.

Serchhip District-a Assembly Bial pathum te zinga Vote nei thei tamna ber 26-Serchhip AC-ah Polling Station 29 awmin Voters 20,607 an awm a, an zinga 9664 chu mipa niin hmeichhe Vote nei 10,943 an awm a, Service Voters 197 an awm bawk. 27-Tuikum AC-ah Polling Station 32 awmin Voters awm zawng zawng 16,905 an ni a, an zinga 8538 chu hmeichhia niin mipa 8367 an awm bawk a, Service Voters 124 an awm a ni. 28-Hrangturzo AC-ah Polling Station 27 awmin Voters 16,649 an awm a, an zinga 8438 te chu hmeichhia niin mipa 8211 an awm bawk a, Service Voters 92 an awm bawk. Assembly Constituency pathum ah hian hmeichhe voters an tam zawk vek a, gender ratio hi 1064 a ni.

Serchhip District chhunga Polling Station 88 zingah 22-Serchhip-XII Polling Station (Little Flower Convent School)-ah vote nei mi 967 awmin voter tamna ber Polling Station a ni a, Polling Station pakhat-a Vote nei mi 900 aia tamna 7 a awm a. 31- Vanchengte Polling Station-ah vote nei mi 95 awmin Polling Station voter tlemna ber a ni a, Vote nei mi 100 aia tlemna Polling Station hi pakhat chiah a awm a ni.

Nimin-a Electoral Roll tlangzarhna hunah hian Serchhip Election Officer Rebecca Laldinmawii Hrahsel leh ERO, AERO leh Political Party aiawhte bakah tlawmngai pawl aiawhte an tel a. Electoral Roll thar tlangzarh a nih hnu hian kum 18 tling chin te tan chuan hming thun thar (Continuous Updation) chu kalpui chhunzawm reng a ni dawn a ni.

Comments

Popular News (Last 30 Days)

Serchhip DCSO sawn a ni

Bawngchawm tlang khualbuk rawktu nia hriat mi 2 man