Serchhip District-ah zangnadawmna la tawh In la thiat duh lo te thiah sak an ni

Serchhip District chhunga National Highway-4 laihzauh leh siamthat hna thawh meka zangnadawmna la tawh, mahni In la thiat duh lo te chu nimin khan khawl hmangin an In te thiah sak tan an ni a. Hei bakah hian kawngpui huamchin tura ruahman Vantlang ram-a bungrua dah te pawh senghawi hna thawh nghal a ni.

National Highway-54 laihzauh leh siamthat hna thawh mekah Serchhip District chhunga zangnadawmna la tawh, mahni In la thiat lo te hi nimin khan Executive Magistrate te kaihhruaina hnuaiah endik leh niin chenna In, In sak lai, Green House leh sawrkar ram lak china mimal bungrua chhawpchhuah te chu thenfai hna thawh a ni a. Serchhip District Bawrhsap leh Competent Authority for Land Acquisition (CALA) David Lalthantluanga hova January ni 29 (Thawhtanni)-a lo rel tawh bawhzuia hmalakna ah hian Executive Magistrate pali (4)- HD. Lalpekmawia, Gaston Vanlalhriatpuia, Daniel Sailo leh Lalhruailiana Zote te kaihhruaiin Khumtung, Baktawng, Chhingchhip leh Chhiahtlang khuaah Eviction Team te hi an chhuak a. Zangnadawmna sum a pumhlum a la tawh si, In la thiat duh lo mi tlem te chu District Administration chuan an chungah khawng taka hma la in, an In hmun lo ram te dan anga thiatin an senghawi sak ta a ni.

Tun tumah hian Khumtung khua ah chenna In pakhat thiah tura ruahman chu In luahtu ten bungraw senghawina tur an la zawn mek avangin tunka Zirtawpni chawhnu dar 2:00 hmaa an bungrua te lo thiarchhuak tura tiin midang 11, Road Reserve Area-a bugnrua leh thildang dah te chu senghawi sak vek an ni a, Baktawng khuaa mi pakhat chu zangnadawmna a lak hnuah a In a la thiah loh avangin thiah sak a ni a. Chhingchhip khuaa mi pahnih te chu an In thiah sak turin thawkchhuak mah se anmahni in an lo thiah avangin khawih sak rih lovin thiat chhunzawm tura tih an ni a.. Chhiahtlang-ah chhungkaw panga (5) zangnadawmna la tawh chunga In la thiat duh te chu thiah sak niin Road Reserve Area-a bungrua dah mim pakhat chu thenfai sak a ni a. Chhiahtlang by-pass Road-ah zangnadawmna la tawh chunga In la thiat o te pawh hmalak a ni bawk.

Tarlan tawh angin NH-54 kawngpui laih mekah Serchhip District huamchhunga sawrkarin ram a lak fel tawh, dan anga zangna-dawmna - Compensation leh Rehabilitation and Resettlement sum leh pai dawng tawh te zingah In leh lo thiat duh lo lui te hi kum 2023 July leh August thla khan Magistrate ten an In-ah ngei kalchilhin an In te thiat tura thupek (Eviction Notice) pek an nih bakah November 22, 2023 khan Serchhip DC David Lalthantluanga, Competent Authority for Land Acquisition (CALA) chuan a hmunah tlawhin an thiah loh chhan te a endik bawk a. Eviction Drive thawhkhatna hi November 28, 2023 khan neih niin Chhingchhip khua ah chenna In pakhat chu khawl hmanga thiah sak a lo ni tawh bawk a ni.

Nimin-a In thiahna ah hian Serchhip atangin Police thahnem tak kalin kawngpui enkawltu NHIDCL leh Contractor te bakah khawtlang hruaitute an tel bawk a, buaina leh harsatna awm lova hmalak niin sawrkar thu zawm lo a harsatna lo siam an awm a nih chuan IPC Section 188 hmangin thubuai siamsak an ni dawn tih sawrkar chuan a lo sawi tawh bawk a. District thuneitute chuan zangnadawmna la tawh, mahni In la thiat lo te chungah dan angin hma an la chhunzawm zel dawn a ni.

Tarlan tawh angin NH. 54 siamthat leh laihzauh hna thawh mek hi kumin March thla a zo hman turin sawrkar laipui chuan a rawn nawr mek a. Hei vang hian hnathawktu ten chak taka hna an thawh theihna tur hian hma lak mek niin nimin-a heng khaw pali te bakah hi chuan hnathawh ti khaihlak thei tura zang-nadawmna kaihhnawiha harsatna a awm tawh lo nia thudawn a ni bawk.