Kumin-a Kangmei venna Hapta hman dan tur rel a ni

Nimin khan Serchhip-ah District Level Fire Prevention Committee chu thukhawmin kumin a Kangmei Venna Hapta hman dan tur chungchang an sawiho.
Serchhip DC Meeting Hall-a thut-khawm hi Serchhip District Bawrhsap David Lalthantluanga chuan kaihruaiin kumin a Kangmei venna Hapta February 5-9, 2024 chhunga hman tur hawnna chu February 5-ah neih nise an ti a, Kangmei chhuah duh zual hun chhungin kang thelh tura rang zawka chet chhuah a nih theih nan kangthelh motor chu Serchhip chhimlam kawt-chhuah Sailiamkawn-ah dah nise an ti a. Kang-thelh motor in rang taka tui a lak theih nan Ser-chhip khawpui chhunga an tui chawina hmun, Fire Hydrant bula motor dah a nih loh nan Traffic Police te chu hma lo la tura tih an nih bakah ramkang awm chhan ni thina ngaih Sa pel khap a nih theih nan District Magistrate atanga thupek tihchhuah a ni anga, kangmei venna kawnga VC te hma la tura hriattirna chu DLAO atangin tih-chhuah a ni bawk ang.

Hei bakah hian kum 2022-a Serchhip District in kangmei veng tha ber lawmman a dawn chu kumin hian a dawn leh theihna tura khaw hrang hranga kangthelh kawngah hmalatu VC leh YMA te tiphura chawknung turin District Fire Prevention Squad chu Divisional Forest Officer (DFO) Thenzawl kaihhruaina hnuaiah din a ni a, Member-ah SDC i/c Disaster Management, Serchhip Fire Station-a Leading Fire Man (LFM), Serchhip Joint VC Chairman, Sub-Hqrs. YMA Serchhip a President leh Police aiawhte ruat an ni bawk.

He thutkhawm ah hian kumin a Lo hal hun chungchangah March 15 hmaa Lo hal vek tur a nih thu he hunah hian tarlan a ni bawk a, Lo hal hun chhunga hal ni lo, hemi hnu lama Lo leh huan hal te chu kangmei tichhuaktu langsar leh buaipuiawm ber an nih thu he hunah hian tarlan a ni bawk.