Poshan Abhiyan Convergence Meeting neih a ni

Nimin khan Serchhip-ah District Level Convergence Committee chu SDO (Sadar) Rebecca Laldinmawii Hrahsel hova thukhawmin Poshan Maah tha taka kalpui dan tur an sawiho.
He thutkhawm Serchhip DC Meeting Hall-a neih ah hian SDO (Sadar) chuan tha taka Poshan Maah kalpui a nih theihna tura tanho a ngaih thu sawiin, Department mal chauhin kenkawh theih a nih loh avangin Line Department ten theihtawp chhuaha an tawiawm tlan a tul thu a sawi a, hmalakna hrang hrang kalpuite tha taka hlenchhuah a ni thin chu lawmawm a tih thu a sawi bawk.

He thutkhawmah hian Block Level Convergence Committee-a an thurel te thlirho niin Serchhip District chhungah Block pahnih - Serchhip leh E. Lungdar Block te awmin heng Block huamchhungah hian Department hrang hrangte telna Convergence Committee din niin Poshan Abhiyaan tluang taka kalpui a nih theih nan rawtna an thlen a. Heng Block huamchhunga Anganwadi Centre hrang hrangah Tui Connection la nei lo te, Gas Connection la nei lo te leh Ek In tha tawk lo chungchang te sawilan a ni a. Retaining Wall leh Creche building sak dan turte leh Common Nutri Garden hmunhma neih dan tur te sawiho a ni a. District Level-a chinfel theih chin te leh State Level a thlen ngai te then hrangin hmalak dan turte sawiho a ni.

Poshan Abhyiaan hmang hian naupang kum 6 hnuailam thang thei lo, an kum leh an rih zawng inmil lo lutuk te, an san zawng leh rih zawng inmil lo lutuk te nuaibo tum a ni a. Hmeichhe tleirawl leh nu hote zinga thisen tlakchhamna (Anaemia) awm thin tihhniam leh nau pianghlim buk zang lutuk awm thin tihhniam tumin mipui vantlangah a zau thei ang bera zirtirna te neih thin a ni.