Serchhip-ah Rulhut hlo pek beihpuithlak tan leh a ni

Kumin atana National Deworming Day (NDD) vawi khatna chu nimin khan ramchhung hmun-dangte rualin Serchhip-ah pawh hman a ni.
Naupang kum 1 atanga kum 19 inkar hnenah rulhut hlo, Albendazole pek beihpui thlakna pual hian New Serchhip Anganwadi Centre No-I ah hun hman niin he hunah hian Serchhip District Hospital-a Naupang lam thiam bik Doctor, Dr. C. Lalrinzama chuan Rulhut in mihring taksa-a harsatna hrang hrang a siam theih dan leh invenna atana pawimawh te sawiin, Mihring taksa ah Rulhut a lo awm a nih chuan kan taksa tana eitur tha kan ei ang ang te a lo ei ve zel avangin mihring a hrisel theih loh thu leh thisen tlakchhamna te a thlen theih thu a sawi a. Kan thil ei atanga Rulhut hi pai theih a nih avangin thil kan ei dawnin kut silfai a pawimawh thu leh thil hel ei chi reng reng ei hma a silfai uluk a tul thu a sawi bawk.

National Deworming Day (NDD) hi India ramah kum 2015 atang khan kalpui tan niin Mizoram-ah chuan kum 2016 khan kalpui tan a ni a, kum tin tum hnih, thla ruk dan-ah he Ni hi hmangin naupang kum khat atanga kum 19 inkar te chu Rulhut hlo hi pek thin an ni a. Tun tumah hian Serchhip District-ah mi 22,378 te hnenah Rulhut Hlo hi pek tura ruahman niin heng te hi Sawrkar School hrang hranga zirlai 8162, Private School-a zirlai 8629 leh Anganwadi Centre-a naupang 541 bakah heng hmun-a kal ve lo mi 504 te an ni a. February ni 9 atangin February ni 16 thleng he beihpui hi thlak tur niin nimin-a hun hman rual hian Rulhut hlo hi pek nghal an ni bawk.