Serchhip-ah National Deworming Day hman dan tur leh Malaria dona a hmalak dan tur sawiho a ni

Nimin khan Serchhip-ah District Level Coordination on National Deworming Day chu thukhawmin District Task Force on Malaria Elimination thutkhawm pawh neih nghal a ni.

Serchhip CMO Conference Hall-a heng thutkhawm neih hi Serchhip Sr. Chief Medical Officer (CMO) Dr. LP. Malsawma chuan kaihruaiin kumin atana National Deworming Day (NDD) hmasa zawk hi ramchhung hmundang te rualin tun thla ni 9 khian hman leh nise tiin a hawnna hun hi New Serchhip Anganwadi Centre-I ah hman tura ruahman a ni a. Hemi ni hian Serchhip District chhung hmun hrang hrangah naupang kum 1 atanga kum 19 inkar hnenah Rulhut hlo, Albendazole chu a thlawna ei tir an ni anga, tun tumah hian Serchhip District chhunga kum 19 hnuailam mi 22,378 te hnenah Rulhut hlo hi pek tura ruahman a ni a. February ni 9-a damdawi ei ve hman lo te tan February ni 16-ah pek leh a ni ang. Rulhut hlo ei hnua naupangin pum nuam lo deuh emaw, insawiselna engemaw an lo neih thulha awlsam taka biakpawh theih tur Adverse Event Management & Emergency Response Team atan RBSK Mobile Health Team te ruat an ni bawk.

National Deworming Day hi kumtin tum hnih hman thin a ni a, nikum (2023) August thla khan Serchhip District-ah naupang 99.35% hnenah damdawi hi pek an ni a. August, 2023 Round-ah hian Mizoram chu India rama a ti tha ber a ni nghe nghe a ni.

Hemi hnu hian District Task Force on Malaria Elimination thutkhawm chu Serchhip CMO Conference Hall-ah hian neih nghal a ni a. Malaria natna umbo tura Serchhip District chhunga hmalakna hrang hrang ngaihthlak niin School leh tlawmngai pawl te zingah nikum chhung khan Campaign vawi sawmsarih chuang neih a ni a. Ramriak te an riahna hmunah tlawhin zirtirna pek an ni a, chanchinbu leh aurinna kaltlang te in tum engemawzat Malaria laka him dan inzirtirna pek a ni bawk. 

He huna tarlan a nih danin nikum (2023) January atanga December thleng khan Serchhip District-ah mi 26,913 enfiah atangin Malaria vei 47 hmuhchhuah a ni a, heng te hi PF 19 leh PV 28 niin Malaria vanga nunna chan mi pakhat a awm a. Kum khat chhunga Malaria vei leh vei lo endik hnem tehna, Annual Blood Examination Rate (ABER)-ah nikum chhung khan Serchhip District chu pakhatna a ni bawk.