Latest News

Chhungkaw 700 huama Pangang khawi lama hmalakna tur Project pathum Thenzawl-ah hawn a ni

Silk Samagra-2 hmanga Mizorama Sericulture hmalakna thar Project pathum chu nimin khan Chief Minister Lalduhoma chuan Thenzawl-ah a hawng a, heng Project pathum hmang hian chhungkaw 700 te huam turin hmalakna kalpui a nih dawn thu a sawi.

Thenzawl Golf Course Auditorium-a Chief Minister in a hawn tak Project te hi cheng nuai 624. 47 senna tur Eri Project- Lai Autonomous District chhunga chhungkaw za (100) thlanchhuah te nena kalpui tur te; cheng nuai 588.36 senga Mulberry Project- Chakma Autonomous District Council-a chhungkaw za (100) thlanchhuahte hmanga kalpui tur leh cheng nuai 1339.61 senga Mizoram pum huapa chhungkaw 500 thlanchhuah te nena kalpui tur Muga Project te a ni a. Chief Minister chuan khawvel pumah Muga Silkworm hi India ramah chauh a vulh theih tih sawiin, “India ramah pawh NE India-ah chauh kalpui theih niin Assam hian an thar tha thin a, mahse Nipui laiin Assam pawh a lum tawh lutuk a, tlangram an rawn melh tan a. Mizoram hi a tha em em tih finfiah tawh a ni,” a ti a. Muga bik hi Cocoon man a to fal hle tih sawiin, a Pangang hi kan thing neihsa Nauthak te, Bul thing te hmanga chawm theih an nih thu leh Mizoram-ah Muga chi siam punna neih kan mamawh hmasa tih sawiin, chumi tur chuan Central Silk Board lamin Muga P3 Unit min pek dawn thu a sawi a, “Kan rama Pangang vulhtute tan hlawhtlin theihna a sang hle ang,” a ti a ni.

Chief Minister chuan heng Project an hawn pathum hi farmer 700 huam tur hmalakna a ni tih sawiin, “A dawngtu tur thlan kawngah kan fimkhur tur a ni a, Ruling party mi leh sa an nih avang duhsak bik neih te a rem kan ti lova, tunhma in chutiang tih chu kan lo ching tawh thin a, hmalakna ten a hlawhchham phah nasa thin a ni. Sawrkar tharah chuan mipui sawrkar kan nih ang ngeiin, tute emaw duhsak nana hmang lovin a hlawh-tling ngei turte ngei thlan kan tum tur a ni,” tiin a beneficiary thlan thuah thawktute chu dik taka kal turin a chah a. Tunah hian khaw 200 chuang ah chhungkaw 4000 chuang in Pangang an vulh mek tih sawiin, an tharchhuah hralhna rate hi sawrkar chuan tihsan a tum thu a sawi bawk.

Nimin-a he hun hman hi Sericulture Department changtu Secretary C. Lalrosanga chuan kaihruaiin Sericulture Minister Lalthansanga chuan khual zahawm niin a hmanpui bawk.

Comments

Popular News (Last 30 Days)