Observer in Electoral Roll ennawn hna thawh a enfiah

Electoral Roll Special Summary Revision neih meka Serchhip District tana Observer leh Mizoram sawrkar-a Secretary, K. Lalrinzuali chuan nimin khan Serchhip rawn tlawhin Electoral Roll Revision neih meka hmalakna te a enfiah.

Serchhip District chhunga Assembly Constituency pathum : 26-Serchhip, 27-Tuikum leh 28-Hrangturzo Constituency-ah te hian kumin January ni 1-a kum 18 tling chin te lain Electoral Roll ennawn hna thawh mek a ni a, hemi atan hian Draft Electoral Roll chu tarchhuah niin dilna hrang hrang lut te enfiah a nih hnuah naktuk, February 8, 2024-ah Final Electoral Roll hi tarchhuah a ni dawn a. Tun tumah hian Serchhip District-a Assembly Bial pathum-ah hian Form 6 hmanga hming thun thar dil mi 260 awmin 22 chu hnawl a ni a, Form 7 hmanga hming paih dilna 280 lutin 27 hnawl a ni a. Form 8 hmanga Hming siamthat dilna 183 lut ah pakhat hnawl niin Form 8 Shifting (Outside AC)-ah 69 leh Form 8 Shifting (Within AC)-ah 33 dawn niin pawm vek a ni bawk.

Nimin-a Serchhip rawn tlawhtu Observer ho hian Serchhip DC Meeting Hall-ah Serchhip Election Officer Rebecca Laldinmawii Hrahsel hovin ERO, AERO leh tlawmngai pawl bakah Political Party aiawhte chuan inkawmna an nei a. He hunah hian Observer K. Lalrinzuali chuan India ram chu Democracy ram a nih angin Electoral Roll dik leh felfai kan neih theih nan mitin ten mawh kan phur tih sawiin, a bik takin sawrkar thawhpuitu khawtlang hruaitute, Political Party leh tlawmngai pawlte an pawimawh hle, a ti a. India khua leh tui dik tak te chauh Roll-ah an awm tur a ni tih sawiin, Electoral Roll dik leh felfai siam a nih theihna tura rawtna leh thurawn pe duh an awm a nih chuan englai pawhin a inhawn reng thu a sawi a. Inthlanna fel leh fai, Electoral Roll dik leh rintlak a awm theih nan Official te thawh-pui zel turin tlawmngai pawl leh Political Party te a sawm bawk.