Serchhip-ah Mizo infiamna hmanga inelna nei dawn

Tun thla ni 20 leh 21 khian Serchhip-ah Serchhip Sub-Hqrs. YMA huapin ‘Inter Branch YMA Indigenous Games Championship’ neih a ni dawn a, lawmman tha tak tak ruahman a ni.

Serchhip-a ‘Inter Branch YMA Indigenous Games Championship’ neih tur chungchang ah hian a buat-saihtute chuan Inrinni khan Serchhip Press Club-a thuthar thehdarhtute kawmin an ruahmanna hrang hrangte an sawi a. He hunah hian he Intihsiakna neih tura Producer VL. Tha-kima chuan he intihsiakna hi Doordarshan leh Mizoram Indigenous Games Association ten an buatsaih tur a ni tih sawiin, Broadcasting Infrastructure Network Development (BIND) hnuaia kalpui tur a nih thu leh BIND hnuaiah hian Programme pali (4) kalpui tur a nih thu a sawi a. Hetiang intihsiakna hi District tinah neiin chuta titha te chuan Aizawl-ah State Level-a intihsiakna an neih leh dawn thu a sawi bawk.

He huna tarlan a nih danin he intihsiakna ah hian Mipa tan Insuknawr, Inbuan, Insaihrui-pawh leh Hmeichhe tan Inkawibah-ah inelna neih tur a ni dawn a, Team-a inelna atan Mipa tan Inkepir/In Arpa thai-ah inelna hi neih a ni dawn a, Team-a pakhatna in Rs. 10,000/-; pahnihna in Rs. 7000/- leh pathumna in Rs. 5000/- bakah a tel zawng zawng tan Rs. 4000/- dawn theih a ni dawn a, mimal inelna ah hian pakhatna in Rs. 5000/-; pahnihna in Rs. 3000/- leh pathumna in Rs. 2000/- an dawng thei dawn bawk a, mimal inelna ah hian Branch pakhat atangin mi pahnih an tel thei ang.

Thuthar thehdarhtute an kawmna ah hian MIGA President Lalhruatluanga chuan kan Hnam infiamna ten mual an liam zel thu leh hre lo tam tak kan awm ta tih sawiin, kan Hnam infiamna te a theih anga chawisan leh awmze neia kalpui a nih theih nan hma an lak thu a sawi a. Mizoram mai bakah India ramchhung chauh ni lo, khawvel huapa hriat lar a nih theih nan hma an lak thu a sawi bawk a ni.