Sawrkar hnuaia hna lakna ah a thiam leh phu te chauh lak an nih tur thu Education Minister in a sawi

School Education Minister Dr. Vanlalthlana chuan Sawrkar hnuaia hna lakna ah a thiam leh phu te chuah lak an nih tur thu a sawi.

Education Minister hian nimin khan Lawngtlai khaw chhunga zirna In hrang hrangte tlawhin thawktute nen inkawmna an nei a, he hunah hian Minister chuan Sawrkar hnuaia hna lakna ah a thiam leh phu te chuah lak an nih tur thu sawiin, Samagra Shiksha hnuaia mi 161 lakna turah pawh Written Exam bakah an thiamna te a taka an hmanchhuah thiam leh thiam loh endik nan ‘Demo-Teaching’ neih tur a ruahman a nih thu a sawi a. Khawi hmun atang pawhin duhsakna lantir tura lehkha ziak a awm a nih pawhin awmzia a awm loh tur thu a sawi bawk. Dr. Vanlalthlana chuan tuna Sawrkar hna lak chungchang a kalphung thar hmanna hian nakin zel ah mi taima, tumruh, a thiam leh phu te chauh in hlawhtlinna an chan theih nana kawng sial lawkna a nih thu a tarlang bawk.

Education Minister hian Lawngtlai DIET tlawhin DIET chu zirtirtu turte zirtir chhawn lehna hmun pawimawh tak a nih angin thiamna tak an zirtir chhuah ngeina turin leh dikna dinpui ngam tura huaisenna an zir chhuahna hmun a hmang turin zirlaite leh zirtirtute chu a chah a. Ram leh hnam hmangaihtu ni turin leh hmasawnna kawnga kaihruaitu ni thei tur a ngaihtuahna hman a pawimawh thu leh thil dik lo tidiktu ni ngam turin zirlaite a fuih bawk a. Dik lo tak a thil tihna chuan rilru dawihzepna a thlen phah thin thu sawiin, zirlai nih lai atanga dikna tan tlat ngam chu an puitlin thlengin mi huaisen leh rintlak an nih thin thu a sawi.

Lawngtlai DIET bakah hian Govt. Region Higher Secondary School leh High School, Samagra Shiksha leh District Education Office te Minister hian tlawhin Zirna In tichangtlung turin mahni remchan dan a mimal leh pawl anga luan chhuahna tur, Sawrkar laipuiin Vidhyanjali a duan chu inziaklut tur leh hemi kawng a tlem tal pawh a tha thawhtu ni theuh turin kalkhawmte a sawm bawk a ni.