NE State-a Sericulture hotute thutkhawm Thenzawl-ah nei

Sericulture Department, Mizoram buatsaih leh hmalaknain nimin khan Central Silk Board (CSB) hotu pawimawh te leh India hmarchhak State hrang hranga Sericulture Department te telna, Joint Coordination Committee (JCC) Meeting chu Thenzawl Golf Course-a Convention Centre-ah neih a ni.

He JCC Meeting hi Central Silk Board Member Secretary P. Shiva Kumar IFS chuan kaihruaiin India hmarchhak huam chhunga Sericulture hmasawnna tur hrang hrang an sawiho a ni.

JCC Meeting hi kum dangah chuan Guwahati, Assam-ah neih thin niin tun tuma Mizo-ram in a thlen hi Guwahati nilo hmundanga nghah a nih vawi khatna a ni a, State pawn atangin Member 33 an lo tel a ni.

He Programme hmang tura lo kal Shiva Kumar, Member Secretary, Central Silk Board hian niminpiah February ni 5 khan Sericulture Department in Silk Samagra 2 hnuaia Project a kalpui mek atanga Eri Cocoon a tharte dah-khawmna hmun a tlawh bawk a. Heng Project hlawhtlinna a taka hmu a, kuthnathawktute thar-chhuah ngei Eri Cocoon a hmuh te chuan a tihlawm hle thu leh phurawm a tih thu a sawi a. Central Silk Board Member Secretary chuan phai lama a hralhna tur te pawh a ngaihtuah pui nghal a ni.

Nimin vek khan Sericulture Minister Lalthansanga chuan Thenzawl a C. Laltanpuia Muga Farm chu tlawhin Department hotu ten Muga hmanga Silkworm khawi dan an lo hrilhfiah a. Muga Silk hi khawvel-a Silk man to ber a ni a. He Muga Silk tharchhuak chi pangang vulh hmanga kut hnathawktute eizawnna siam sak hi Sericulture Department leh Central Silk Board hmalak mekna a ni a. Central Silk Board kaltlangin Sericulture Department chuan chhungkaw 500 tuam tur Muga Project a kalpui tan mek a ni.