Mizoram-ah Cooperative Movement a awm theih nan ngaihtuahna thar sen a tul thu sawi

Cooperation Department changtu Minister PC. Vanlalruata chuan Mizoram-ah Cooperative Movement a awm theih nan ngaihtuahna thar sen a tul thu a sawi.

Cooperation Minister hian nimin khan Aizawl Babutlang a Registrar of Cooperative Societies (RCS) Office chu tlawhin thawktute nen an inkawm a, he hunah hian Minister chuan Cooperation Department chu mipui tana a pawimawh zia sawiin, Department dangte nena tha taka thawkho tura hmalak a nih theih nan zirchianna kalpui mek a nih thu leh thawktute chu hmalam pan tura inbuatsaih turin a chah a. Sawrkar in Cooperation a ngaihpawimawh thu leh Mizoram-ah Cooperative Movement a awm theih nan ngaihtuahna thar sen a tul thu sawiin, “Kan ramin hmasawnna a hmuh chhoh zel turah pawh a langsar ber department ni thei turin tan kan lak a tul a ni,” a ti bawk.

Agriculture Department changtu Minister ni bawk PC. Vanlalruata chuan Agriculture-a hmasawnna tak tak thlen turin Cooperative Society-te nena thawhho a tul thu a sawi a. Thawktu indaihlohnate pawh post ruak hnawhkhah chhoh zel tum a nih thu a sawi a. Sawrkar hna thawhna kawngah thawhhona boruak tha a pawimawh thu tarlangin, Department-a thawktu zawng zawngte chu mahni thawhpui theuhte nena innel leh inkawmngeih taka thawk tlang turin a fuih a. Harsatna an neihte inthlahrung hauh lova Minister hnena thlen hreh lo turin a chah bawk a. Registrar Office atan hmunhma rem zawk ngaihtuah a nih tur thu a sawi bawk.

Nimin-a he hun hmanna ah hian Cooperation Department changtu Secretary Vinay Kumar IAS chuan Mizoram khawtlang leh hnam kalphung hrim hrim chu Cooperative Societies nena inmil tak a nih thu a sawi a. COVID-19 hripui avang te’n Cooperative Sector chuan harsatna hrang hrang tawk mah se, Minister thar kaihhruaina hnuaiah department chuan hmalam a pan zel theih a beisei thu a sawi bawk.