RD Block 11-ah MGNREGS Social Audit nei dawn

Tun thla ni 14 thleng khian Mizoram District hrang hranga Rural Development (RD) Block sawm leh pakhat (11) huamchhung a khaw 165-ah MGNREGS Social Audit neih a ni dawn a, nimin khan Social Audit hi neih tan a ni.

MGNREGS Social Audit neih tur pual hian January ni 30 khan District leh Block tin atanga Official ten nen Social Audit Entry Meeting neih a lo ni tawh a, he hun hi C. Laltleipuii, Director, Social Audit Unit, MISSAAT, Mizoram chuan kaihruaiin Social Audit tangkaina te, a thil tum te leh mamawh tur hrang hrang te a hrilhfiah a. He Social Audit neih tur hi Social Audit Expert, District Resource Person leh Block Resource Person 55 bakah Village Resource Person 165 ten an kalpui dawn a ni.

Kum 2005-a siam MGNREG inkaihhruaina dan in Gram Sabha hnenah Social Audit neih theihna chanvo a pek ang leh he dan hnuaia Section 17-na in Khaw tinah Social Audit hi kalpui vek tur a tih angin, Director kaihhruaina hnuaiah Level hrang hrang-District, Block leh Village Level-ah te Social Audit hi neih thin a ni a. Social Audit Unit din tirh atang hian Mizoram khaw hrang hrangah Social Audit vawi 3249 neih tawh a ni.

Social Audit hian a tum ber chu mipuite chawikanna leh hmasawnna scheme hrang hrang sawrkarin a siam atanga hamthatna dawngtu, a bikin thingtlangmi, hna kalpui a nihna khuaa mipuite leh a Scheme buaipuitu Official zawng zawngte nena tangkawpa a tha thei ang bera a hlawhtlinna hmuh a nih theihna tura theihtawp chhuaha endik pui hi a ni a. Langtlang, rintlak leh awmze nei taka hnathawh reng reng kalpui a nih theihnan leh mipuite hmasawn nan Social Audit hi a pawimawh em em a. Mipuite’n an dikna chanvo an hmuh ngei theihna tura hriattir pawh tih makmawh nia hriaiin audit neih a nih apiangin hetiang lam hawi hian mipuite hnenah zirtirna pek tel thin a ni bawk.