Ran chaw siamna kawngah hma kan lak hmasak a ngai - Minister, AH&Vety

AH&Vety Minister C. Lalsawivunga chuan Mizoram chu Sa, Artui leh Bawnghnute ah a intodelh lo tih sawiin, Ran chaw siamna kawngah hma kan lak hmasak a ngai niin a sawi.

ZPM Party in nimin-a Aizawl-a Chhung Inkhawm an neih ah AH&Vety Minister C. Lalsawivunga chuan Mizoram chu sa-ah kan intodelh loh thu leh Artui leh bawnghnute-ah pawh kan la intodelh lo tih sawiin, “Hemi atan hian hmalakna tur pawimawh tak tak a awm a, a bikin ranchaw siamna kawngah hian hma kan lak hmasak a ngai hle a ni,” a ti a. Thil reng reng a bulthut atanga hmalak a nih loh chuan hlawhtlinna leh intodelhna tluantling a awm thei lo tih sawiin, “Kan ramah hian ranchaw siamna atana tangkai Vaimim leh Thlai dangte pawh a thar tha duh hle a, chutih laiin Vawiin thleng hian phai lam atangin ranchaw kan la chawlut reng mai te hi kan hmalakna tur leh intodelh kawngah ke kan penna hmasa tur a ni,” a ti bawk.

Minister C. Lalsawivunga chuan an party sawrkarna petu mipuite chungah lawmthu sawiin, Zoram mipui ten ZPM sawrkarah rinna sang tak an nghat mek tih a sawi a, “Kan ti beidawng thiang lo a ni. Kan ram tan kan tih theih zawng zawng ti turin hma kan la mek,” a ti a. “Ka Department chan Local Administration Department, District Council & Minority Affairs, Art & Culture leh Animal Husbandry & Veterinary Department te hi direct-a mipuite rawngbawl sakna pawimawh tak a nih vangin ralkhat atanga mipuite mamawh en lova a hmun ngeia kala an mamawhte enpui leh sawipui a ngai thin a, Vawk vulhna hmunah te, Bawng leh ran dang vulhna hmunah te kalin mipuite mamawh leh harsatna te a takin a hmun ngeiah kan hmuhpui mek a ni. Mipui leh party worker te pawhin kalphung thar hi min thlawp tha hlein ka hria a, tha taka kan thawhho zel ka beisei,” a ti.

Tunhnaiah Social Media hmang thiam lo kan pung nasa hle tih pawh Minister C. Lalsawivunga chuan sawiin,mipuite kan fimkhur a ngai hle tih a sawi a. “Social Media hi mimal tin leh pawl dinhmun tichhe vek thei leh chawikang dawrh thei a ni a, a tha zawng leh a chhe zawngin mipuite min nghawng mek a ni. Thu tling lo leh thu dik lo vawrhdarh nan Social Media hi i hmang lo ang u. Zirlaite pawhin tangkai takin an zirlai atan hmang thiam se la, chutiang bawkin mimal, pawl leh Kohhran te bakah Politic huangah pawh a tha zawnga hmang theuh turin mipuite ka chah a ni,” a ti bawk. 

Comments

Popular News (Last 30 Days)

Vawiin-ah HSSLC Exam result