Aizawl by-pass siamna tur cheng vbc. 500 pek phal

Sawrkar laipui chuan Aizawl By-Pass road siamna tur sum cheng vbc. 500 pek phalna chu Mizoram sawrkar pe in a hriattir a, hnathawh tan dan tur chungchang pawh niminpiah khan Chief Minister Lalduhoma leh Prime Minister aiawh Dr. Jitendra Singh te chuan an sawidun nghal a ni.

Zirtawpni kalta khan sawrkar laipui-a Ministry of DoNER chuan Aizawl khawthlang lam by-pass road laihna tur sum cheng vbc. 500 chu pekchhuah phal a nih thu Mizoram sawrkar a Chief Secretary a rawn hriattir a, hemi chungchang ah hian Chief Minister Lalduhoma chuan, niminpiah tlai khan Prime Minister a zin avanga a aiawha lo dawngsawngtu Union Minister of State for Prime Minister's Office, Dr. Jitendra Singh nen New Delhi-ah inkawmin an sawi dun a, PM-DevINE atanga sawrkar laipuiin Aizawl By-pass siamna tura a ruahman hnathawh tanna tura lungphum hawn dan turte an sawi a, hei bakah hian Mizoram hmasawnna tur thil pawimawhte an sawidun bawk a ni.

Hetihlai hian MNF Party chuan Aizawl By Pass Road (Sairang - Muallungthu) siamna tur sum cheng vbc. 500 Ministry of DONER in PM- DevINE atanga a rawn sanction fel te chu lawmawm an tih thu nimin khan thuchhuah siamin an tarlang a. Aizawl khawpui chhunga lirthei tawt lutuk tizualtu lian tak chu khawpui chhunga bungraw liantham phur tlan lut thinte a nih fo avang leh kan kawng te ti tlo lo tu a nih thu hriain khatih laia Chief Minister chuan Aizawl khawpui helna tur kawng siam a tul thu Central Sawrkar hnenah a thlen nasa hle tih an sawi a. Sairang atanga Khawchhak lam leh chhim lam panna tur kawnglian siam dan ruahmanin Chhim lam pan tur kawng hi Sihhmui-Sakawrtuichhun-Tanhril-Tlangnuam-Samtlang leh Lungleng inkarah kalin Muallungthu ramah Aizawl-Thenzawl kawng a pawh ang a. Hei hi Central pawhin pawmpuiin Union Budget-ah vbc. 500 hi a lo dah tawh tih an sawi a. Mimal ram compensation-ah harsatna awm deuh avangin kum kalta chhung khan sanction hmuh hman ni ta lovin tunah hian sanction hmuh a lo ni ta chu lawmawm an ti takzet tih an sawi a ni.

Hei bakah hian MNF thuchhuah chuan Khawchhak lam panna tur kawng pawh Sairang-Rangvamual ral lehlam, Bawngkawn Brigade Field hmar lam atanga Leiverh kaw hnih (Twin Tunnel) awmin, Zemabawk - Selesih kawng, Muthi thlen hma kawn hnuai chhuah lamah a lo chhuak ang tih an sawi a; Chuta tang chuan Tuirial Airfield hmar lama lui kanin Phaibawk bulah kawngpui fin tur a ni tih an sawi a. Hemi atan pawh hian leiverh hna hi Tender chhuah fel a ni ta bawk tih sawiin, “Ram tan rohlu tak a nih chhoh zelna turin tuna rorel mekte hian tha tak leh kuttling taka an chhunzawm ngei MNF chuan a beisei,” an ti bawk a ni.