Ramri hung leh FMR chungchang lo helh chiam tul a tih loh thu Chief Minister in a sawi

Chief Minister Lalduhawma’n Mizoram-a Myanmar leh India ramri hung leh Free Movement Regime chungchanga Union Home Minister a kawmna ah Mizoram tan beiseina awma a hriat thu leh tun dinhmuna lo helh chiam tul a tih loh thu a sawi a. Assam sawrkar nen ramri buai hmain inbiak an tum thu a sawi bawk.

Nimin-a New Delhi atanga rawn haw Chief Minister Lalduhoma hian nimin tlai khan CMO Conference Hall-ah thuthar thehdarhtute kawmin tunhnaiah Guwahati leh New Delhi-a a zinna chungchang a hrilh a. Chief Minister chuan New Delhi-a a cham chhungin Union Home Minister Amit Shah nen an inkawm thu sawiin, ramri hung leh Free Movement Regime (FMR) tihtawp an duh loh thu a thlen nawn leh thu a sawi a, “Kan inbiakna boruak a lawmawm ka ti. Ramri an hung dawn lo erawh ka ti ngam lo,” tiin Amit Shah nen an inbiakna atanga ngaihtuahin ramri hung tur helchiam lo ila kan tisual lo mai thei tih a sawi bawk a. Manipur chu an duh anga hung tura a tih angin Mizoram tan pawh beiseina a awm nia a lan thu a sawi a ni.

Buaina avanga Zohnahthlak rawn raltlante enkawl an nih kawngah Tlawmngai Pawl leh Kohhrante chunga an lawmthu pawh sawiin Chief Minister chuan, “Union Home Minister nen kan inbiakna atangin raltlan enkawlna kawngah harsatna kan nei lo turin kan ngai, a in hawng viau. Duhthal erawh chu kan hmu kher lo ang,” a ti a. NGO-te'n boruak tha tak an siam avangin Central dawr pawh a nawm phah tih sawiin, “Chutihrual erawh chuan Mizo leh Kristian kan ni a, kan tih awm leh awm loh thliar thiam a tha. Lim in hal sakte hi thi rawh se intihna a ni,” a ti a, harsatna kan tawh phah theih avangin Lim in hal sak thleng chu tawh lo se a duhthu a sawi bawk.

Chief Minister chuan Assam Chief Minister nen ramri chungchang an sawidun thu pawh thuthar thehdarhtute hnenah hian sawiin, “A rang lama ramri chinfel kan duh a, buai hma ngeiin. Ramri hrula awmten buai an hlau,” a ti a. Ramri-ah buaina siam lo tura an inrem thu sawiin Chief Minister chuan, “Buaina a awm a nih pawhin chinfel vat nise kan ti. Arunachal Pradesh leh Meghalaya nena an inrem dan kalphungte pawh kan en dun,” a ti a, remchang hmasa berah Assam Chief Minister-in ramri enkawltu Minister Mizoram-ah a rawn tirh dawn thu a sawi bawk.

Lalduhoma chuan tun tum Delhi-a a zinin a hmuhchhuah chu PMO a thu tih leh sawrkar hnathawkte'n sawrkar lai an thlawp tha tih a nih thu sawiin, “Sawrkar hnathawkten sawrkar lai support loh an hlau. Sawrkar thlawp lo chu an leng lawp lawp. An insiamrem tha,” a ti a. Sawrkar dinglai thlawp thei lo ang emaw zawnga lo che awm lo hram hram se a duhthu sawiin Chief Minister chuan, “Sawrkar hnathawk an nih angin sawrkar lai thlawp mai se,” a ti a, Delhi-a sawrkar hnathawkte chu Pisa hun chhung vawndik kawngah pawh an entawntlak thu a sawi bawk.

Ramngaw humhalh chung leh raw material kan neihte hmang tangkai chunga hmasawnna kalpui an duhthu pawh Chief Minister chuan sawiin, “Hmasawnna kan neih dawn chuan tawrh chin erawh kan neih a ngai. Hmasawnna tikhawtlai leh tithuanawp zawnga ramngaw humhalh erawh tha kan ti lo,” a ti.

Social Media-a Fake account chungchang a thuthar thehdarhtute zawhna pawh chhangin Chief Minister Lalduhoma chuan, “Anmahni kan huat vang a ni lo. Chhui chhuah theih lo-a kan ngaih chuan political party mai ni lo, thenawm leh mimal inbeihna atan te kan la hmang ang,” a ti a, Fake Account chu kan Society tan a that loh thu a sawi bawk.

Chief Minister hian new Delhi-a a zin chhung hian Prime Minister a zinbo avangin Minister of State to Prime Minister hnenah Mizo-ram mamawh hrang hrang a thlen thu leh Union Minister of State, Ministry of Minority Affairs pawh a hmuh thu a sawi bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar