Road Safety Month hawnna nei

Tun thla, February 2024 chhunga hman tur ‘Road Safety Month 2024’ hawnna chu nimin zing khan Serchhip-ah neih niin Serchhip District Superintendent of Police MS. Dawngkima chuan he hun hi a hmanpui a ni.
Serchhip Bazar-a Road Safety Month hawnna ah hian Serchhip SP chuan kawngpui hmangtu chu mi chi hnih an awm thu sawiin, lirthei-a hmangtute leh ke-a kal nana hmangtu te an nih thu a sawi a. Lirthei a pun zel avang leh kan tana awlsamna thlentu a nih ruala harsatna min thlentu a nih theih avangin kawngpui hmangtute lirthei laka vanduaina kan tawh palh theih laka fimkhur a tul zia inzirtirna atan ‘Road Safety Month’ hi hman a tul thu a sawi a. Ram changkang tawh (Developed Country)-ah chuan lirthei te tam mah se mipui ten Dan an zawm that avangin chhiatna thleng a tlem thu leh ram thanglai (Developing Country)-ah erawh chuan Dan zawm kan ngaih-thah thin avanga chetsualna leh vanduaina thleng a tam thin thu a sawi a. Serchhip District-ah kum 2021 khan lirthei chetsualna thlenga nunna chan mi 7 awmin kum 2022-ah mi 10 an awm thu leh nikum-ah erawh an awm loh thu a sawi bawk.


Serchhip SP chuan lirthei khalhtute chu lirthei khalh tura an thut chiahin Dan leh hrai ten a  phuar tih hre tura chahin, ke-a kal-a kawngpui hmangtute pawhin Motor hlat thei anga kal thin tur leh kawngpui kanna hmun siam bik (Zebra Crossing) hmang tangkai turin a chah a, Nu leh pa ten an tu leh fa kum tling lo te lirthei khalh tir thin lo turin a chah bawk.

Serchhip-a Road Safety Month hawnna hun hi ZDU Serchhip President H. Malsawma chuan kaihruaiin Serchhip District Transport Officer (DTO) PC. Biakrikhuma chuan lirthei khalhtute chu ruihtheih thil laka fihlim turin a chah a. Lirthei chuanman chu Association te bithliah tur a ni lo tih sawiin, State Transport Authority kut a ni tih hre turin a chah bawk. He hunah hian Serchhip DTO Office-a MVI Lalrohlua chuan lawmthu sawiin hun a hmang bawk a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man