In sak tanpuina sawifiah

Mizoram sawrkar-a Rural Development Department chuan Pradhan Mantri Awaas Yojana Gramin (PMAY-G) hnuaia In sak tanpuina atan cheng nuai 16,215.875 vel la mamawh belh a nih thu an sawi.

PMAY-G chungchanga RD Department thuchhuah chuan mirethei chhungkua, chenna In nei lo leh Rap In-a chengte ten chenna tha an neih theih nana he ruahmanna hi kalpui a ni tih sawiin, he Scheme hnuaiah hian beneficiary tin-te hian In sak nan Rs. 1,30,000/- zel an dawng thin tih an sawi a. Mizorarm-in Target kan neih zawng zawng, In 29967 te hi Registration tih vek tawh an nih thu leh State Nodal Account-a Fund dawn anih veleh a sem mai theih turin Administrative Sanction pawh ruahman lawk fel vek tawh a ni tih an sawi a. Insak kallai leh la sak tan loh zawng zawng te chu March 31, 2024 hmaa zo vek turin Ministry of Rural Development, Govt. of India chuan State tin te a beisei tih an sawi.

RD Department thuchhuah chuan PMAY-G beneficiaries te hi Socio Economic Caste Census (2011) Data atanga thlan an nih thu leh kum 2016-17 Financial Year atanga hman tan chauh a nih avangin chhan hrang hrang avanga paih ngai tam tak an awm laiin thunbelh erawh a theih loh tih an sawi a. Kum 2018 khan Ministry of Rural Development, Govt. of India lam chuan Awaas+ Survey rawn ruahmanin hemi hmang hian In sak tanpuina mamaw te chu thun belh leh theih an ni ta tih an sawi a. SECC 2011 atanga a pumpuia target Mizoram in neih chu 13,532 leh Awaas+ atang hian 16,435 kan nei veleh bawk tih an sawi.

Tun dinhmunah State Nodal Account ah sum engmah a awm tawh loh avangin Ministry of Rural Development lamin sum an lo sanction leh State Nodal Account (SNA) a Insak tanpuina pawisa a luh hnuah Insak lai zawng zawng chu sak chhunzawm tura ruahmanna siam a ni tih sawiin, Insak lai zawng zawng leh PMAY-G target pumpui zawh nana sum la mamawh belh zat chu cheng nuai 16,215.875 vel a nih thu an sawi bawk.