PWD Minister in Zuangtui-a PWD Quality Control, Research and Development Division a tlawh

Public Works Department (PWD) Minister Vanlalhlana chuan nimin khan PWD hnuaia Quality Control, Research and Development Division, Zuangtui chu tlawhin an hmalakna te a enfiah.

Nimin-a he hmun a tlawhna ah hian PWD Minister chuan PWD Minister a nih veleh atangin hna tha leh tlo siam kawnga pawimawh ber 'Quality Control' chu ngaih pawimawh hmasaka a neih thu leh PWD Office zinga tlawh hmasak bera a neih chhan pawh a ngaih pawimawh zia lantirna a nih thu a sawi a. PWD hnuaia hmalakna peng pawimawh tak Quality Control, Research & Development Division chu tun aia changtlung, pawimawh leh tha zawka kalpui a duh thu sawiin, thawktu indaihlohna leh mamawh angte pawh a tul dan anga ngaihtuah zel a nih tur thu a sawi bawk.

PWD Minister chuan inkaihhruaina siam te tha taka zawm chunga sawkar kaltlanga In sak, kawngpui siam leh hnathawh dangte puitlin a nih theih nan theihtawp chhuah a tul thu sawiin, PWD hmalaknate chu quality tha leh tlo, chhawr tlak ngei a nih theih nana thahnemngai taka thawk turin mawhphurtu zawng zawngte a fuih a. Sawrkar hnuaia hmalakna te chu entawntlak leh chhuanawm tak a nih theih nan enzui leh vil that a tul thu a sawiin, hemi tur hian hnathawhna atana hmanraw lakkhawmte chu a remchan dan ang zela uluk taka enfiah thin turin a chah bawk.

PWD Minister hian Insakna, kawngpui siamna leh PWD kaltlanga hmalakna hrang hranga hmanraw hman thin Cement, Balu, Lei, Rod, Bitumen, Cement Mix, Building foundation zawh chin leh adangte endikna hmunpui November ni 1, 2002 a hawn Central Laboratory tlawh nghalin hmalakna te pawh a tlawh nghal bawk.