Latest News

Serchhip-ah Kangmei ven pawimawh zia inzirtirna Hapta hawnna neih a ni

Kangmei vanga chhiatna thleng thin laka kan himna tura kangmei ven a pawimawh zia inzirtirna Hapta ‘Fire Prevention Week 2024’ hawnna chu nimin khan Mizoram hmundang te rualin Serchhip-ah pawh neih a ni a. Serchhip SP MS. Dawngkima chuan he Hapta hawnna hun hi khuallian niin a hmanpui a ni.

‘Thapui thawhin kangmei chhuak tur i veng ang u’ tih thupui hmanga tun thla ni 9 thlenga hman tur ‘Fire Prevention Week 2024’ hawnna hun Serchhip DC Conference Hall-a neih ah hian Serchhip SP MS. Dawngkima chuan Mizoram hmun hrang hrang dinhmun thlirin kangmei ven kawngah tan lak nasat a ngai tih sawiin, Fire Prevention Week hman pawh thil tul leh pawimawh tak a nih thu a sawi a. Kangmei chu chi hnih (2) - ram kang (forest fire) leh In kang (domestic fire)-a then theih ni mah se ngaih pawimawh ve ve a tul a, kangmei ti chhuak lo turin kan zavaiin kan fimkhur tur a ni, a ti. Serchhip SP chuan Kangmei ven hna chu sawrkar leh tlawmngai pawl te chauh tih tura dah lovin, kan zavai a kan tih tur leh mawhphurhna a nih dan te, Fire Prevention Week kan hman chhung chauha vei lova, nitin-a kan tih tur leh nunpui tur a nih thu te leh kangmei ven a tulzia zirtira hrilhchhawngtu tur kan nih thu he hunah hian sawiin, theihtawp chhuah turin he huna tel te chu a chah a ni.


Serchhip District Honorary Wildlife Warden RL. Chhuanawma kaihhruai he hunah hian Serchhip District Fire Prevention Committee-a Member Secretary leh Thenzawl DFO Lalbiakchama Chawngthu chuan kangmei ven kawnga Mizoram pum leh Serchhip dinhmun report tlangpui a tarlang a. Mizo Lo neih dan, Lo vata hal thin kan nih avanga kan ramngaw chereu chhoh zel dan te, Lo hal hun laia tihsual palh avanga kangmei lo chhuak thin te, fimkhur loh avanga ramngaw kang thin te avanga Mizoram chhunga ramngaw chhah tha kan neih tlem tak zia te sawiin, fimkhur leh zual turin mipuite chu a chah bawk a ni.

He huna tarlan a nih danin Serchhip District-ah hian ramngaw zau zawng chu 80.47% a ni a, heng zinga 16.8% chu ramngaw chhah tha, Very Dense Forest (VDF) a ni a. India ram pumah Mizoram chu ram zau zawnga tehin Forest Area nei zau ber niin ISFR 2021 record-a a lan danin 84.53% chu forest in a tuam a, amaherawhchu VDF area erawh 0.74% chauh niin India hmarchhaka VDF nei tlem ber kan ni thung a. Jhum Cultivation avang leh ramngaw kan nasat avangin Mizoram chhunga ramngaw kan neih te a tlahniam zel a, ISFR report hnuhnung berah chuan kum 2020 aiin 2021 ah ram ngaw zau zawng hi 0.88% in a tlahniam a ni.

Nimin-a he hun hman ah hian kangmei veng tura thutiam chhamrual niin kangmei ven a pawimawh zia thusawi ngaihthlak a ni bawk.

Comments

Popular News (Last 30 Days)