Eptu pawl mawhphurhna tha taka hlenchhuah tum

Mizoram Assembly House-a Opposition Leader Lalchhandama Ralte chuan an party chuan Eptu Pawl mawhphurhna tha taka hlenchhuah an tum dawn tih a sawi.

Nimin-a Assembly Secretariat Banquet Hall-a thuthar lakhawmtute a kawmna ah Opposition Leader Lalchhandama Ralte chuan eptu pawl an nih vang ngawtin a pawng-a pui-a sawrkar hmalakna sawisel a, va dodal chiam chiam lam chu an tum ber a nih loh thu a sawi a. Sawrkar hmalaknaah thil tha a awm a nih chuan theihtawpin an tawiawm anga, sawrkar hmalakna chu thlawp zel an tum a. Hetihrual hian, ram tana tha lo emaw, thutlukna dik lo emaw a awm a nih chuan a siamtha tura theihtawp an chhuah tur thu leh sawrkar hmalakna chu an sawisel hreh loh tur thu a sawi. 

MNF Legislative Party Leader ni bawk Lalchhandama Ralte chuan Leader of Opposition dinhmun luah thei hnuhnung ber chu kum 20 kalta a Congress Legislative Party Leader Lal Thanhawla a nih thu leh khami hnu ah erawh he dinhmun luah thei, Party mala seat awm zawng zawng hmun 4 a then a hmun khat la thei an awm tak loh avangin Opposition Group Leader bâk an awm thei ta lo tih a sawi a. Tun term ah MNF chuan he dinhmun hi an luah leh thei chauh tih sawiin, Leader of Opposition nihna chu Cabinet Rank a nih thu leh Cabinet Minister te hamthatna dawn leh an dinhmun ang chiah pek ve a ni a ti a, chutihlai chuan Sawrkar hnathawk, a bikin Assembly a thawktute ngei pawhin an chian bik loh thu a sawi bawk a ni.