Power inrenchem lehzual turin P&E in an ngen

Power & Electricity Department chuan Thlasik chhung bikah mipuite chu Power inrenchem lehzual turin an ngen.

Tunhnaia thuchhuah an siamah Power & Electricity Department chuan tunlaiin Power Supply khaihlak a awm zauh zauh thin tih tarlangin, “Kumin Thlasik hi kum dang zawng aiin a nat avangin mipui ten heater etc. kan hmang nasa a, kan electric line leh Transformer in a zo lo thin a, Veng thenkhatah in en chhawk a ngai thin a ni,” an ti a. P&E Department chuan heng a awm tawh lohna tur hian theihtawpa an hmalakna tarlangin, Phai atanga Power Supply kan hmuhna pakhat Luangmual Sub-Station Incoming line ah hian 70MW pelh phal a nih ngai loh avangin Thlasik-ah peak load laiin load shedding in en chhawk a ngai thin tih an sawi a. Power tarn zawka lakluh a nih theihna turin Conductor lian zawka thlak mek a nih thu leh Tlangnuam Sub-Station-a Transformer lian Overload avanga load shedding ngai thin tihtawp nan transformer lian dang dah belh mek a nih thu tarlangin, Chawnpui Sub-Station-a Transformer lian overload chhawk turin Maumual Sub-Station atangin Transformer te (DT) thenkhat chawm then tum ni bawkin heng hnate hi January thla chhungin thawh zawh a ni ang tih an tarlang a ni.

Hei bakah hian hmun tam taka Electric hrui atan bare conductor kan la hman chu hrui dum (ABC) a thlak vek tum a nih thu tarlangin, hemi rual hian hrui (Service connection wire, LPS, Zonet leh Internet Cable) kal fello zawng zawng te siam rem tum a ni tih an tarlang a. Hei bakah hian Distribution Box kang thin te pawh design thar siamin lei fel tawh a nih thu leh heng thlak chhung hi hun engemaw chen chu power khaihlak a la awm zel dawn thu an tarlang a. Heng te avang hian hun dang zawng aiin Thlasik chhung bik hian power inrenchem lehzual turin mipuite an ngen a. Hmasawnna tur hnathawh avanga power khaihlak awm thinah mipuite hriatthiamna an ngen tak meuh meuh tih an tarlang a ni.