NGOCC in ramri hung leh FMR tihtawp an duhlo tih an sawi

Mizoram-a tlawmngai pawl hrang hrang telna, NGO Coordination Committee chu niminpiah tlai khan Aizawl-a MZP Pisa Pui-ah thukhawmin India Sawrkarin India leh Myanmar inrina hung a tum chungchang leh ramri hnaiha chengte inkalpawh theihna, Free Movement Regime (FMR) thiah a tum chungchang an sawiho.

He thutkhawm ah hian Myanmar ramchhungah Zofa unau thahnem tak an chen thu leh Border Fencing leh FMR thiah tum chu Zofate inunauna leh inpumkhatna tichhe thei a nih avangin NGOCC thukhawm chuan tha a tihloh thu leh Mizo hnam thendarh tumnaah an ngaih thu an sawi a FMR chu dan hnuaia ramri hung hian ramri a chengte tan nasa taka harsatna a siam dawn avang leh Mizo hnam inpumkhatna khawih chhe thei a nih avangin hemi kawnga hmalakna hi tihtawp a nih theihnan hmalak an rel ni.

NGO Coordination Committee thukhawm chuan Union Home Ministry-ah NGOCC hmingin hemi chungchang ah hian Memorandum thehluh ni se, Mizoram sawrkarah pawh lehkha thehluh ni bawk se tiin an rel a. Hei bakah hian ramri hungin a nghawng tur State dangte pawh a tul anga thawhpuia sawm ni se an ti bawk.

Hetihlai hian Union Home Minister Amit Shah chuan India leh Myanmar inrina KM 1643 a thui chu hung vek a ni ang tih a sawi a. Amit Shah chuan sawrkarin ramri hung tur hian thutlukna a siam tih sawiin, heng ramri hungte hi uluk taka vilin Patrol Track te pawh siam a ni ang tih a sawi a. Ramri KM 1,643 zingah hian Moreh-a KM 10 a thui chu hung ni tawhin hei bakah hian Pilot Project pahnih pawh tan tawh a ni tih a sawi a. Arunachal Pradesh leh Manipur huam-chhunga KM khat a thui ve ve hung a nih dawn thu leh Manipur huamchhungah pawh KM 20 vela thui chu hung tura pawm a nih tawh thu a sawi a ni.