Hand Holding Policy kalpui tur chu Central Sponsor Schemes te nena kaihkawp a ni dawn

Chief Minister Lalduhoma chuan thlai tharchhuah lam te, thilsiam chhuah lam leh Services tha siam thei te tanpui turin Hand Holding Policy an kalpui dawn tih sawiin, Central Sponsor Schemes te nena kaihkawp tur a nih thu a sawi.

NABARD bultuma ‘Mizoram State Credit Seminar, 2024-25’ nimin-a MRB Head Office Conference Hall, Aizawl-a neih a hmanpuina ah Chief Minister Lalduhoma chuan Thlai tharchhuah lam te, thil siamchhuah lam leh Services tha siam thei te tanpui turin Hand Holding Policy an kalpui dawn tih sawiin, Central Sponsor Schemes te nena kaihkawp tur niin Bank ten mawhphurhna pawimawh tak an chelh dawn tih a sawi a. A dawngtu tur beneficiary thlan thu ah Ruling Party mi leh sa, hlawhtling lo tur tih chiang reng te an duhsak ve ngawt dawn lo tih sawiin, “Chung mite vang chuan Sawrkar policy a lo hlawhchham fo tawh a, Bank te pawhin an hnena loan pek in hreh thin tih kan hria a ni,” a ti a. “Tumah duhsak bik leh duh loh bik nei lovin, mipui sawrkar kan nih angin a hlawhtlinpui ngei turte chauh kan thlang dawn a, uluk takin Line Department ten an vil zui bawk ang. Chuvang chuan Bank te tan chung mite lo puih chu a nuam zaih tawh dawn a ni,” tiin sawrkar ruahmanna te a hrilh a. Mizoram in hma a sawn zelna kawnga tha thawhtu tangkai tak ni ngei turin Bank zawng zawngte an beisei tlat tih a sawi bawk.

Chief Minister chuan Mizoram-ah NABARD kaltlanga hmasawnna hnathawh a tam thu leh hmachhawp pawh kan ngahin an tangkai hle tih a sawi a. Thlai chinna tur Short Term Loan (KCC) chungchang uar zawka mipuite hnena thehdarh tha a tih thu te, PACS kan neih te mumal leh uar zawka hman tangkai tha a tih thute, Self Help Group te tana sum leh pai remchang tam zawk siam tha a tih thute pawh a sawi bawk a ni.

He hunah hian Khual zahawm Agriculture Minister PC. Vanlalruata chuan kan ramah Market thlir chunga thlai chin uar turin hma an la tih sawiin, a hun taka thlai chi tha an hmuh theih nana hmalak te, an theihna tipung tura Farm Mechanization uar zel te an tum thu a sawi a. “Hnathawktu ten an mamawh hun tak zela sum hman hawh tur an neih theih nan nangni Financial Institution te hi in pawimawh em em a, lo inhawng zau turin ka ngen che u a ni,” tiin PACS te pawh thuam thata tihchangtlun zel a ni dawn tih a sawi bawk.

Nimin-a he hun hmanna ah hian Chief Minister hian ‘State Focus Paper- 2024-25’ chu tlangzarhin Agriculture Minister nen hian sawrkar Scheme kaltlanga pek Loan thahnem tak, Bank hrang hrang te Sanction Order chu Loan hmutute hnenah an hlan a. Mi pawimawh hrang hrang ten thu an sawi bawk a ni.