MZP in Nisa leh ruahsur hnuaia zirna kalpui tha ti lo

Mizo Zirlai Pawl (MZP) General Hqrs. chuan nisa leh ruahsur hnuaia zirna kalpui chu engti kawng mahin rem an ti lo tih sawiin, tun thla ni 10 ralhma ngeia zirlaite harsatna sukiang turin sawrkar chu an phut bawk.

Tunhnaia Social Media lama lo lang, Govt. Nepali Primary School Rangvamual a zirlaite School kawt-a Class an lak chungchang chu nimin khan MZP General Hqrs. chuan a hmunah tlawhin an harsatna leh an dinhmun te an enfiah a, Govt. Nepali Primary School, Rangvamual-ah hian zirlai Nursery-ah 30, KG-ah 22, Class I-ah 27, Class II-ah 19, Class III-ah 16 leh Class IV-ah 13 awm mekin an vaiin zirlai 127 an awm mek a, Zirtirtu a nghet 2 (pahnih), MR Zirtirtu pakhat leh SEDP zirtirtu pakhat an nei mek tih an sawi a. He School hi an building a tet em avangin zirlai tam zawkin Sikul chhung an chang lova, pawn ni sensa hnuaiah Class an la thin niin an sawi a. Zirtirtute pawhin awmna tur an neih loh avangin chaw chhumna (kitchen)-ah thuin, chuti chung chuan zirna hi an kalpui naw naw niin an sawi a ni.

MZP Branch Rangvamual chuan tunhma atangin thuneitute hnenah Govt. Nepali Primary School Rangvamual hi ngaihsak turin a lo ngen tawh thin tih MZP thuchhuah chuan tarlangin, tunlai ram changkang tawh, Computer Age-a cheng tawha kan in ngaih laia kan ram chhung ngei, Aizawl Minicipal Coorporation (AMC) huamchhungah hetianga sawrkar sikul dinhmun chhe lutuk leh ngaihthah a la awm fo chu mak an tih thu leh pawi an tih thu an sawi a. “World Class Education kan sawi tawh laia zirna in ngaihsak a hlawh tak tak loh zia tarlangtuah MZP chuan a ngai a ni,” an ti a. MZP chuan nisa leh ruahsur hnuaia zirna kalpui chu engti kawng mahin a remti lo tih sawiin, “Tunkar chhung (February 10 ralhma) ngeia sawrkarin zirlaite harsatna sukiang tura Immediate Action a la lo a nih chuan a tul angin hma a la dawn a ni,” an ti a. “Heng kan zirlai puite’n nisa leh ruahsur hnuaia lehkha an zir avanga an hriselna in a tuar a nih chuan sawrkarin mawh a phur ang,” an ti bawk.