Mizoram Police ten ‘Zo Lanu’ tia hriat lar an man

Social Media kaltlanga mipat hmeichhiatna hmang lai tihchhuah a nih chungchangah he thil-a inhnamhnawih mi pathum te chu man an ni.

Kar kalta Zirtawp zan khan Social Media-a mipat hmeichhiatna kaihhnawih pholangtu, ‘Zo lanu’ tia hriat leh a thiannu te lakah hian Mizoram State Commission for Women chuan Zirtawpni khan Suo Moto hmanga thubuai ziaklutin, Cyber Crime Police te chu ni 7 chhunga an hmalakna report turin an ngen a, hei bakah hian Centre for Environment and Social Justice pawhin Cyber Crime Police-ah FIR an thehlut bawk a ni. 

He thil hi Mizoram Police Cyber Crime te chuan chhui zui nghalin he thil a inhnamhnawiha puh, Social Media kaltlanga mipat hmeichhiatna hmangtu hmeichhia leh mipa te bakah account hawh tirtu hmeichhe pakhat chu Zirtawpni zan zanlai pelh hnu khan man an ni a, a pathum hian IT Act Section 67-A hmanga thubuai siam sak niin Inrinni khan Court-a hruai nghal an ni a. Court thupek angin hmeichhe pahnih chu Jail-a dahluh nghal an ni a, Mipa erawh Bail-a chhuah lailawk tir a ni thung.

Mizoram Police chuan mipui te chun Social Media hman danah fimkhur hle turin a chah nawn leh a, Social Media a dan bawhchhia te chungah dan hmangin na taka hma lak zel a nih tur thu a tarlang bawk.