Mizoram Lok Sabha MP in lungawi lohna a thlen

Mizoram Lok Sabha MP C.Lalrosanga chuan Manipur chungchang leh India leh Myanmar inkungkaihna chungchanga zawhna Ministry of Home Affairs chhan tura Parliament-a a thehluh tam zawk chhan a ni lo chu a lungawi loh thu Union Home Minister Amit Shah hnenah ziakin a thlen.

Inrinni kalta-a Lok Sabha 17-na thutkhawm hnuhnung ber leh a tawp ni-ah Amit Shah hnenah Mizoram Lok Sabha MP hian lehkha hi a thehlut a. Manipur boruak chungchang leh India leh Myanmar ramri hung leh a kaihhnawih, zalen taka ram pahnih mipuite an intlawhpawh a an insumdawntawn theihna (Free Movement Regime) tihtawp chungchanga a zawhnate pawh chhan a ni lo tih C. Lalrosanga chuan a tarlang a. India leh Myanmar ramri hung leh ramri hrul a chengte inkalpawh phalna tihtawp chungchangah hian Parliament-ah sawrkar lamin Official taka thu chiang engmah an la sawi chhuah loh thu sawiin, hemi chungchanga thil awm dan sawi chiang turin Union Home Minister chu a ngen a ni. 

Ramri hung leh a kaihhnawih inkalpawh phalna tihtawp a nih chuan ramri hrula chengte tan harsatna nasa tak a thlen dawn avanga hemi chungchang hi ngaihtuah tha tura sawrkar a ngen thu MP chuan a tarlang a. Hmakhawsang atanga ramri lehlam lehlam amite inkalpawhna leh Zofate inunauna ti thuanawp thei zawnga hma la lo turin Amit Shah a chu a ngen bawk a ni.

Mizoram Lok Sabha MP C. Lalrosanga chuan Ministry danga a zawhna thehluhte tha taka chhan a nih lai a, Ministry of Home Affairs-in a zawhna tam zawk an chhang lo leh an chhan loh chhan pawh sawifiahna awm lo chu a lungawi loh thu a thlen niin Akashvani Aizawl a hrilh a. Nikum lamah khan Manipur buaina chungchang pawh Lok Sabha a sawi chhuah ngei tumin vawi duai lo dilna a lo thehluh tawh thu MP chuan a sawi a. Vawi khat mah phalsak a nih loh thu a sawi bawk.