Kum 6 chhungin Mizoram-ah In kang 242 awm

Mizoram-ah kum 2018 atanga kumin 2024, January chhungin chenna In kang 242 a awm a, heng In kang-a bungraw kangchhia hlut zawng chu Rs. 70,27,05,842 hu nia chhut niin nunna chan mi 18 an awm bawk.
Fire & Emergency Services hotute sawi danin, kum 2018 atanga kumin 2024 thleng a kangmei chhuah tam ber kum chu 2021 niin hemi kum hian In kang 71 awmin, ram kang (forest fire) 199 awmin, kangchhia hlutna Rs. 26,92,60,507 hu a tling a. Kangmei chhuah tlem ber kum chu kum 2019 niin In kang 28 leh ram kang 16 awmin Rs. 1,39,15,930 hu bungraw kang chhia a awm. Hetihlai hian kum 2022-ah kangmei vanga nunna chan mi 15 zet awmin 2019-ah mi 3 an thi bawk a. Kumdang ah kangmei vanga thi chhinchhiah an awm lo thung a ni.

Kumin 2024-ah January thla chhung khan Mizoram-ah chenna In kang chhinchhiah 4 a awm a, chungte chu Aizawl Fire Station-ah 3 leh Champhai Fire Station-ah 1 te an ni a. Heng In kang-a bungrua kangchhia hlut zawng chu Rs. 79,00,200 hu a tling a, nunna chan an awm lo thung a ni.

Mizoram-ah Fire Station 14 a awm mek a, chung zinga Fire Station 5 te chu Aizawl khawpui chhung a awm niin, Kolasib, Serchhip, Cham-phai, Lunglei, Tlabung, Lawngtlai, Siaha, Mamit leh Vairengte-ah te Fire Station a awm bawk a ni.