Lung In-a tang tur leh sum chawi turin hrem

Kum 2012-a All India Radio (AIR), Aizawl Station-a hna siam chawp hmanga sum cheng nuai 8 chuang tihchingpen thubuaia thiamloh chantir mi 3 te chu kum 2 atanga kum 4 lung In tang tur leh pawisa chawi turin Court-in a hrem.

Special Judge (Prevention of Corruption Act), Mizoram chuan kar hmasa Zirtawpni khan AIR Aizawl a thawk mi 3 te thiamloh a chantir hnuah nimin khan hremna puangin All India Radio, Aizawl Station-a Asst. Director ni thin Zosangzuala chu kum 4 lung In tang tur leh cheng nuai 6 chawi tura hrem a ni a, pawisa hi a pe thei lo a nih chuan kum 3 tan belh a ngai dawn a. AIR Aizawl-a Programmme Executive hna thawk thin Lalnunziri chu kum 2 lung In tang tur leh cheng nuai 6 chawi tura tih niin LDC ni thin Judy H. Lalmuanpuii chu kum 2 lung In tang tur leh cheng nuai 6 chawi tura tih a ni bawk a, an sum chawi tur hi an pe lo a nih chuan kum 3 an tan belh dawn bawk a ni.

Court tarlan dan chuan, January 2012 atanga June 2012 inkar chhung khan khatih hun laia All India Radio, Aizawl Station-a Asst. Director Zosangzuala te, Programmme Executive Lalnunziri leh LDC Judy H. Lalmuanpuii te chuan All India Radio, Aizawl Station-a thawk tur angin a tak awm silo in Casual Production Assistants 20 chhawr anga ziak felin, hemi atana sawrkar pawisa kalral chu Rs. 2,60,444/- a chhut a ni a, hei bakah hian a tak awm si lovin Music Artiste 39 te hla record anga tarlangin, heta sum kalral hi Rs. 6,08,916/- a nih thu a tarlang bawk a, CBI in he thubuai hi Court-a a finfiah hnuah thiamloh chantir an nih thu puangin hremna pek an ni ta a ni.