Thuchhuah siam thuai turin sawrkar an ngen

Mizoram Government Provisional Adhoc School Association chuan an dinhmun tura sawrkar in ruahmanna a siam chu April 1, 2024 atanga hman tan theih tura thuchhuah siam turin sawrkar chu an ngen.

Nimin-a thuchhuah an siamah Mizoram Government Provisional Adhoc School Association chuan nikum September thla a Council of Minister thukhawm in hun rei tak khawtlangin an lo enkawl tawh Lumpsum School thenkhatte Provisional Adhoc Status-a a hlangkai chu khawtlang leh School zirtirtute an lawm em em tih an sawi a. “Tuna kan sawrkar chak tak leh kan Minister chak takin kalpui chhunzawm zel tur a nih thu a sawi hi lawmawm kan ti a, kan harsatnate hrereng chunga ruahmanna a siam hi kan lawm em em a, thinlung takin a chungah lawmthu kan sawi a ni,” tiin “Sawrkarin a lo ruahman angin April 1, 2024 atanga hman tan theih tura thuchhuah chiangkuang tak leh felfai tak kan sawrkar hian min siam sak thuai turin kan beisei tlat a ni,” an ti a. Khawtlang mipuite leh zirlai nu leh pate chuan tun dinhmunah nghakhlel takin an thlir mek nia sawiin, a taka function ngei tura sawrkar thuchhuah an nghahhlelh thu an sawi a ni.