Kawlphetha hman man ti sang lo turin rawtna thlen

Mizoram sawrkara Power & Electricity Department chuan kum 2024-25 chhunga kawlphetha hman man tur rawtna chu Mizoram leh Manipur enkawltu, Joint Electricity Regulatory Commission (JERC) hnenah a thehlut a, êng chhit man hi tisang lo a a ngai hman an rawt.

JERC hotute sawi danin, P&E Department chuan January 17, 2024 khan kum 2024-2025 chhunga power enkawl nana sum an mamawh, Aggregate Revenue Requirement (ARR) leh tariff thar bituksak turin Commission-ah petition an thehlut a, an rawtna thlen ang chuan tuna êng chhit man (power tariff) hman lai hi sawrkar kum tharah pawh hman nawn leh an dil a, kawlphetha hman man hi tihsan rawtna a tel lo a. JERC chuan Power Department-in kawlphetha enkawl nana sum leh pai an mamawh tur leh sum an hmuhchhuah zat turte a zirchiang anga, hemi hnuah hian tariff subsidy a pek tur zat a bituk felsak dawn a ni.

Hemi chungchanga zawhna chhangin Power Minister F. Rodingliana chuan kum thum chhung electric bill chungchang an lo zir tawh thu te, sawrkarna an chan chhungin Electric Bill chu tihpun loh an tum thu a sawi a, sawrkar kumthara hman tur êng chhit man rawtna an thlenah pawh kawlphetha chhit man tihsan rawtna an thlen loh thu a sawi a ni. P&E minister chuan kawlphethaa intodelh turin kawng hrang hrangin hma an la tih a sawi bawk a, Solar Plant lian siam tura hmalak mek a nih thu sawiin, Hydel Project hluihlawn tawhte chu thuam thar turin hma an la mek a, budget tharah pawh kawlphetha intodelhna tura hmalakna atan cheng vaibelchhe za tel an dah dawn tih a sawi bawk.