Taxation Minister hovin Deptt. hotute thukhawm

Taxation Department hnuaia Officer leh Staff te chuan nimin khan Aizawl-a Taxation Auditorium ah 'Sensitization and Consultative Meeting' an nei a, he hun hi Taxation Minister Dr. Vanlalthlana chuan hmanpuiin Department hnathawh leh hmalakna bakah Department hmachhawp te sawiho a ni.

Finance & Taxation Department changtu Principal Secretary Vanlal Chhuanga kaihhruai he hunah hian Taxation Minister Dr. Vanlalthlana chuan Taxation Department chu Mizoram Sawrkar tan Revenue laluttu pawimawh ber pakhat a ni tih sawiin, Department Officer leh Staff te chu theihtawp chhuaha Mizoram tana thawk turin a fuih a. Hmalak dan tur hrang hrang leh a ngaih pawimawh zawngte sawiin, chhiah hi ram mipuite enkawlna tura Sawrkarin a lak a ni a, Chhiah lakkhawm pung chho zel hian ram hmasawnna a keng tel a ni tih a sawi a. Nasa lehzuala chhiah pawimawhna te mipuite hnena hrilh turin Department hotute a hrilh bawk Hei bakah hianChhiah petuten awlsam taka chhiah an pek theihna tur hmanrua, a bikin computer leh internet hmanga Department-in project hrang hrang a kalpui mek chu tichangtlung lehzual turin hmalak tum mek a ni tih a sawi bawk.

Kum 2023-24 chhunga Mizoram Sawrkar-in Taxation Department te target a tuk chu cheng vbc. 1000 (B.E.) a ni a, chu chu State's Own Tax Revenue cheng vbc. 1084.29 (B.E.) atanga chhutin 92.22% a ni a. Hei hian Taxation Department-ah Mizoram Sawrkar hi a innghat thuk hle tih a lantir tih sawrkar thuchhuah chuan tarlangin, January 2024 thleng khan cheng vbc. 922.83 an lakhawm tawh a; thla 10 chhungin thla tin cheng vbc. 92.28 lalut zel ang an ni. Tunah hian cheng vbc. 1000 (B.E.) target hi hmu thei ngei tura an in ngaih thu an sawi bawk.

Comments

Popular News (Last 30 Days)

Vawiin-ah HSSLC Exam result