Fimkhur loh leh suahsual vanga ram ti kang te chungah Dan anga hma la ngei turin CM in a chah

Chief Minister Lalduhoma chuan fimkhur loh vang te, suahsual vanga ram tikangte chu an chungah dan anga hma lo la ngei turin hmuntina dan lekkawhtute a chah.

Nimin-a ‘Kangmei Ven Hapta, 2024’ hawnna Synod Conference Hall, Aizawl-a neih a hmanpuina ah Chief Minister Lalduhoma chuan kan pi leh pute khan ram kang pawizia an hriat avangin Lo leh huan an hal dawnin tha takin Meilam an sial thin thu leh Meilu khaiin an hal chauh thin tih a sawi a. “Vanduai thila kangmei a chhuah palh pawhin a pachhuakin a thelh turin an bei vat a, rang takin an thelh leh thin. Keini, thangthar fing zawka ngaihte hian kan ram hi kan tikang nasa hle a, ramngaw venhim thuah kan pi leh pute kan tluk ta lo niin a lang a ni,” a ti a. Kan eizawnna atana loh theihloh a Lo kan hal chu engpawh nise kan fimkhur loh avanga kan tikang thin chu en liam a har em em tih a sawi a. Chuvang chuan ngaihtuahna thar pua kangmei laka kan ram venghim tura thapui thawh thar turin mipuite sawmin, “Fimkhur loh vang te, suahsual vanga ram tikangte phei chu an chungah dan anga hma lo la ngei turin hmuntina dan lekkawhtute ka chah a ni,” a ti a. “Kan ram hi vawiin leh naktuk-a chhuan lo la awm zel turte tan chenna tlak ram thaah kan siam ngei tur a ni,” a ti bawk.