Education Minister in Education Department hnuaia hmalakna tur hrang hrang a puang

School Education Minister Dr. Vanlalthlana'n School Education Department hnuaia Teaching leh Non-Teaching Staff aikal la te list chu DP&AR hnenah thehluh a ni tawh tih sawiin, an thu ngaihchan a nih thu a sawi.

Education Minister Dr. Vanlalthlana hian nimin khan a pisa-ah thuthar thehdarhtute kawmin Zirna chungchanga sawrkar hmalak dan tur hrang hrang a sawina ah he thu hi a sawi a, Minister chuan aikal lak chu a vai vaia tihbo a harsat thu leh hrisellohna avanga aikal la te an hrethiam a, amaherawhchu thildang avanga aikal la te erawh chu ngaihnathiamna a awm dawnlo tih a sawi a ni. SEDP hnuaia Teaching leh Non-Teaching Staff chungchang pawh sawiin, SEDP hnuaia mi 1000 chuang rawih mekte chu a tirah ban nghal tura tih nimahse, zirna in a tawrh lohna turin March ni 31 thleng lo lak an nih tawh angin hemi hun thleng hi chu hna an zawm tur thu a sawi a, amaherawh chu SEDP a lo tawp tak avangin heng Teaching leh Non-Teaching Staff te hi rawih an nih hun chhung bak chu pawhsei sak an rem dawn lo tih a sawi a. SEDP hnuaia Teaching leh Non-Teaching Staff atana lak tam takte chuan aikal an la tih hriat a ni tih sawiin, heng mite hi an hnathawhna tur hmuna an awm that loh avangin anmahni Bank Account-ah ni lovin, aikal-a an chhawr, hna thawk tak tak zawkte Bank Account-ah an kut hah man hi thunsak tum a ni tih a sawi a. LDC leh Group D lo bang tawh te post lo hnawhkhat lailawk turin Headmaster theuhte kutah thuneihna pek a nih thu a sawi bawk.

Tunhnaia Samagra hnuaia Zirtirtu post lak turah pawh fair tak a tih anih tur thu sawiin, Written Test leh Interview bakah Teaching Demonstration hmang te a candidate te chu buk an nih tur thu a sawi a. Teaching demonstration neih dan turah hian Candidate te chu Topic 10 thlan tur pekchhuah a ni dawn a, he Topic hi Minister emaw, ZPM lam atangin tuman an hre dawn lo tih a sawi a. Interview a thu tur mithiam an awm dawn bakah 3rd Party Observer te an awm dawn bawk a, anni hian a hranin Candidate te chu Mark an lo pe in Interview tu te Mark pek nen ennawn anih leh dawn thu a sawi a, hei hian thehfung dik tak zawk hmangin Zirtirtu tha an la thei dawn tih a sawi a ni.

Education Minister Dr. Vanlalthlana hian Mizoram Education kalphung siamtha turin High Level Committee, Mizoram Education Reforms Committee din tum a nih thu leh Zirna kawng hrang hranga thurawn lakna tur leh Mizoram zirna kalphung zirbingna leh ruahmanna (Research & Planning) buaipui turin Education Consultant ruat tum anih dawn thu a sawi a. Zirtirtute an kal tha nge thalo en nan Biometric hman tum mek anih laiin tun mai ah chuan School tin ah dah theih mai a ni rih lo a, QR code lo hman lawk anih tur thu leh QR Code pawh In lamah scan mai theih anih avangin Giotag hmangin Zirtirtute chu an awmna a hriat theih nan hman a ni dawn tih a sawi bawk.